БАЛАЛАРДЫҢ ҚАУІПСІЗДІГІ — БАСТЫ НАЗАРДА

Шымкентте жыл басынан бері балалардың терезеден құлауына байланысты 9 жағдай тіркелген. Төтенше жағдайлар департаментінің мәліметінше, оның 4-і қайғылы жағдаймен аяқталып, 5 бала түрлі дене жарақатын алған. Осындай оқиғалардың алдын алу мақсатында Тұран ауданында көпқабатты тұрғын үйлердің тұрғындарына профилактикалық түсіндіру жұмыстары жүргізілді.

 Төтенше жағдайлар департаментінің ұйымдастыруымен өткен іс-шарада балалардың қауіпсіздігіне ерекше назар аударылды. Мамандар тұрғын үйлерді аралап, ата-аналарға балаларды қараусыз қалдырмаудың маңызын түсіндірді. Сонымен қатар, қауіптің алдын алу үшін тұрғындарға терезеге арнайы қауіпсіздік бекіткіштерін орнатуды ұсынды. Іс-шара барысында олар үлгі ретінде екі үйдің терезесіне бала өздігінен аша алмайтындай арнайы бекіткіш орнатты.

Департамент мәліметінше,осы жаз айында аудан аумағында балалардың терезеден құлауына қатысты 3 жағдай тіркелген. Абырой болғанда, бұл оқиғалардың ешқайсысы қайғылы жағдаймен аяқталмаған. Негізінен мұндай жағдайлардың басым бөлігі бала үйде ересектердің бақылауынсыз қалған кезде немесе ата-ана басқа бөлмеге алаңдап кеткен сәтте орын алады. Осындай кезде терезедегі бекіткіштердің қорғап қалу мүмкіндігі жоғары болады.

Жалпы қарапайым сақтық шараларын елемеудің соңы орны толмас өкінішке әкелуі мүмкін. Сондықтан бала қауіпсіздігі ата-ана үшін де, қоғам үшін де басты назарда болуы тиіс. Терезеге арнайы қауіпсіздік бекіткіштерін орнату, москит торына сенбеу және баланы қараусыз қалдырмау – қайғылы жағдайлардың алдын алудың негізгі талаптары. Басты мақсат – қауіптің алдын алып, бала өмірін қорғау.