ҚАЗИЕВ КӨШЕСІНІҢ ЖАЛҒАСЫ ПАЙДАЛАНУҒА БЕРІЛДІ

    Шаһардың жол желісіне тағы бір жаңа бағыт қосылды. Өткен жылы құрылысы басталған Қазиев көшесінің жалғасы пайдалануға берілді. Енді төрт жолақты жаңа жол қаланың солтүстік бөлігіндегі көлік қозғалысын жеңілдетіп, Бәйдібек би даңғылына түсетін жүктемені азайтуға сеп болмақ.

 Дәл қазір біз Қазиев көшесінің Арғынбеков көшесінен Төлеметов көшесіне дейінгі жаңа бөлігінде тұрмыз. Ұзындығы 1,7 шақырым болатын төрт жолақты жолдың құрылысы 2025 жылдың наурыз айында басталып, бүгінде толық аяқталды. Бұған дейінгі көлік жүктемесін ескерсек, жаңа жолдың іске қосылуы қозғалысты жеңілдетуге мүмкіндік береді. Әсіресе бұл бағыт Ақжайық пен Шымсити шағынаудандарының тұрғындары үшін тиімді. Себебі жаңа жол олардың қала орталығына қатынауын жеңілдетіп, қосымша бағыт ұсынып отыр.

Шымкент қаласының Бас жоспарына сәйкес, жол инфрақұрылымын дамыту мақсатында жүзеге асырылған нысанның құрылысына 1,7 миллиард теңге қаржы жұмсалған. Құрылыс жұмыстарын жүргізу үшін қалалық Жолаушылар көлігі және автомобиль жолдары басқармасы мен «Корпорация Береке А» ЖШС арасында мемлекеттік сатып алу туралы келісімшарт түзілген. Сонымен қатар, жол салу барысында мемлекет мұқтаждығына алынатын 12 нысан анықталған.

 Жоба аясында жол төсемін салумен қатар, оның айналасындағы инфрақұрылым да ретке келтірілді. Жол жиектеріне ирригациялық жүйе орнатылып, абаттандыру жұмыстары толық орындалған. Жалпы шаһарда бұдан бөлек жол инфрақұрылымын дамытуға бағытталған басқа да ірі жобалар жүзеге асырылып жатыр. Соның бірі – Бәйдібек би даңғылы бойындағы жолайрықтардың құрылысы. Сала мамандары үшінші жолайрықты жыл соңына дейін көлік қозғалысына ашуды жоспарлап отырғанын жеткізді.

 Жалпы жаңа жолдар мен жолайрықтардың кезең-кезеңімен іске қосылуы көлік ағынын бірнеше бағытқа бөліп, негізгі магистральдарға түсетін жүктемені азайтуға мүмкіндік береді. Бұл өз кезегінде қала тұрғындарының қатынауын жеңілдетіп, Шымкенттегі көлік қозғалысының қолайлылығын арттыруға бағытталған.