ИНТЕРНЕТ АЛАЯҚТАРЫНА ТОСҚАУЫЛ

Бір телефон қоңырауы немесе жалған хабарлама. Осылайша мыңдаған адам алаяқтардың арбауына түсіп жатыр. Әсіресе, егде жастағы азаматтар жиі зардап шегуде. Осы мәселенің алдын алу мақсатында Шымкентте зейнеткерлердің құқықтық әрі цифрлық сауаттылығын арттыру мақсатында арнайы іс-шара ұйымдастырылды. 200-ге жуық зейнеткердің басын қосқан жиында алаяқтықтың алдын алу жолдары түсіндірілді. Экономикалық тергеп-тексеру департаменті мен Белсенді ұзақ өмір сүру орталығының ұйымдастыруымен өткен шара алдымен зейнеткерлерге арналған сергіту сәтінен басталды. Бір мезетте 200 зейнеткер ән шырқап, би билеп, көтеріңкі көңіл күй сыйлады. Ұйымдастырушылардың айтуынша, бұл шара қатысушылардың белсенділігін арттырып, алдағы түсіндіру жұмыстарына деген қызығушылығын оятуға бағытталған.Негізінен мұндай іс-шаралар интернеттің қарқынды дамуы мен алаяқтық әрекеттердің көбеюіне байланысты уақыт талабынан туындап отыр. Қазіргі таңда алаяқтар көбіне егде жастағы азаматтарды нысанаға алады. Солардың бірі 70 жастағы Қайыңкүл Айнабалаева алаяқтардың арбауына түсе жаздағанын айтты. Оның сөзінше, алаяқтар өзін алдап, атына несие рәсімдеуге әрекеттенген. Алаяқтардың дәл осындай зейнеткерлерді нысанаға алуы бекер емес. Өйткені олар егде жастағы адамдарды тез сенгіш деп есептейді. Сондықтан бүгінде қалада киберқауіпсіздік бойынша түсіндіру және алдын алу шаралары жиі ұйымдастырылуда. Соның бірі – Белсенді ұзақ өмір сүру орталығында өткізілетін арнайы кездесулер. Мұнда зейнеткерлерге алаяқтардың түрлі айла-тәсілдері түсіндіріліп, күмәнді жағдайларда қалай әрекет ету қажеттігі жөнінде кеңестер беріледі.

Жалпы, ашық аспан астында өткен шара барысында департамент мамандары тұрғындарға қаржылық қауіпсіздік ережелерін түсіндіріп, интернет алаяқтарының кең таралған тәсілдері туралы жан-жақты ақпарат берді. Сондай-ақ белгісіз нөмірлерден түскен қоңырауларға сақтықпен қарау, жеке деректерді ешкімге бермеу және күмәнді сілтемелерге өтпеу қажеттігі ескертілді. Ұйымдастырушылар мұндай кездесулер алдағы уақытта да жалғасатынын айтып, тұрғындарды цифрлық сауаттылықты арттыруға шақырды.