Қала күні қарсаңында Премьер-Министрдің бірінші орынбасары Нұрлыбек Машбекұлы Шырайлы Шымкент қаласына жұмыс сапарымен келді. Сапар аясында ол қала әкімімен бірге жаңғыртудан өткен екі саябақтың ашылу рәсіміне қатысты. Бұған дейін «Қиял әлемі» және «Кен баба» атауларымен белгілі болған демалыс орындары толық жаңартылып, заманауи келбетке ие болды.
19 маусым – Шымкент қаласының күні. Айтулы мереке қарсаңындағы жұмыс сапары Шымкент халықаралық әуежайынан басталды. Мұнда қала әкімі Ғабит Сыздықбеков әуежай терминалының жұмысын таныстырып, қазіргі таңда жүзеге асырылып жатқан жобалар туралы баяндады. Сонымен қатар, Премьер-Министрдің бірінші орынбасары әуежай аумағында салынып жатқан екінші ұшу-қону жолағының құрылыс барысымен танысты. Құны 46 миллиард теңгені құрайтын жоба 2027 жылы аяқталады деп жоспарланған. Жоба іске қосылғаннан кейін әуежайдың өткізу қабілеті артып, қолайсыз ауа райы жағдайында, оның ішінде тұман кезінде де әуе кемелерін қабылдау мүмкіндігі едәуір жақсарады.
Бұдан кейін жұмыс сапары жаңаша үлгіде қайта жаңғыртылған «City Park» саябағында жалғасты. Ашылу рәсіміне Үкімет басшысының бірінші орынбасары мен қала әкімі, қоғам қайраткерлері, ардагерлер, қоғамдық кеңес мүшелері және мәслихат депутаттары қатысты. Олар жаңа саябақтың лентасын қиып, нысанды ресми түрде ашты.
Жаңа демалыс орны бұрынғы «Қиял әлемі» саябағының орнында бой көтерген. Заманауи талаптарға сай жабдықталған нысан тұрғындардың бос уақытын тиімді өткізуіне және жайлы демалуына мүмкіндік береді. Ашылу салтанатына жиналған қауым саябақты аралап, мұнда атқарылған жұмыстармен танысты.
Одан әрі делегация жапон стилінде абаттандырылған жаңа саябаққа барды. Мұнда жиналған қауым саябақтың салтанатты ашылу рәсіміне қатысып, ішін аралап көрді.Жалпы жаңа демалыс аймағы бұрынғы «Кең баба» саябағының орнына салынған. Ерекше сәулеттік шешіммен безендірілген нысан жапон эстетикасын дәріптеп, тұрғындарға тынығуға қолайлы орта қалыптастырады.
Жалпы аумағы 19,6 мың шаршы метрді құрайтын саябақ толық абаттандырылған. Мұнда жапондық бақ мәдениетінің элементтері, сәндік сәулет нысандары мен жасанды су айдындары үйлесімді орналастырылған. Саябақты аралап, атқарылған жұмыстармен танысқан Премьер-Министрдің бірінші орынбасары Шымкент қаласының қарқынды дамуына оң бағасын берді.
Осылайша, Шымкент қаласының күні қарсаңында тұрғындарға екі бірдей жаңа демалыс орны тарту етілді. Заманауи талаптарға сай қайта жаңғыртылған саябақтар қала тұрғындары мен қонақтарының бос уақытын тиімді өткізуіне мүмкіндік беріп, шаһардың сәулеттік келбетін айшықтай түсті. Алдағы уақытта да мегаполисте тұрғындардың өмір сүру сапасын арттыруға бағытталған ауқымды жобалар кезең-кезеңімен жүзеге асырылмақ.
