«AMANAT» партиясы мен «Әділет» партиясы бірікті. Тарихи шешім Астанада өткен «AMANAT» партиясының XXVI съезінде қабылданды. Делегаттар бұл бастаманы бірауыздан қолдап, ел дамуының жаңа кезеңінде барлық прогрессивті саяси күштерді ортақ құндылықтар төңірегіне топтастыруға бағытталған маңызды қадам екенін атап өтті. Съезге Қазақстанның барлық өңірінен келген делегаттар, Саяси кеңес мүшелері, Парламент депутаттары мен «Жастар Рухы» жастар қанатының белсенділері қатысты. Жиында Мәжіліс төрағасы Ерлан Қошанов Мемлекет басшысы Қасым-Жомарт Тоқаевтың реформалары елдің жаңа келбетін қалыптастырып жатқанын айтты. Оның сөзінше, тәуелсіздікті нығайту, халықтың әл-ауқаты мен ұлттық бірлік бүгінде басты құндылықтарға айналды. Партия төрағасы қос партияның бірігуін барлық деңгейдегі партия мүшелері қолдаған саяси үдеріс деп бағалады. Сондай-ақ съезде Президенттің саяси бағытын іске асыру аясында атқарылған жұмыстардың қорытындысы шығарылды. Ерлан Қошановтың баяндамасынан кейін делегаттар күн тәртібіндегі мәселе бойынша ашық дауыс берді. Нәтижесінде депутаттар мен партия өкілдері ұсынылған бастаманы бірауыздан қолдап, тиісті шешім қабылдады. Осы шақырылымда бастамашылық етілген 118 заң жобасының 104-ін «AMANAT» фракциясының депутаттары әзірлеген. Бұл барлық заңнамалық бастамалардың 88 пайызын құрайды. Бұдан бөлек, депутаттар халықпен мыңдаған кездесу өткізіп, өзекті мәселелерді шешуге бағытталған жүздеген депутаттық сауал жолдады. Партия әлеуметтік жобалар арқылы да нақты нәтижелерге қол жеткізді. «Қарызсыз қоғам» жобасы азаматтардың қаржылық сауаттылығын арттыруға ықпал етсе, «Ауыл аманаты» бағдарламасы ауылдық жерлерде жаңа жұмыс орындарының ашылуына мүмкіндік берді. Ал «Жер аманаты» жобасы аясында мемлекетке миллиондаған гектар жер қайтарылды.
Үш жыл ішінде «Халықпен бірге!» сайлауалды бағдарламасының 70 пайызы орындалды. Осы уақыт аралығында жүздеген мектеп салынды, әлеуметтік сала қызметкерлерінің жалақысы көтеріліп, медицина саласында жаңа нысандар пайдалануға берілді. Сонымен қатар ауылдық жерлерге жұмысқа баратын дәрігерлерге көтерме жәрдемақы қарастырылды. Партия өкілдерінің айтуынша, екі саяси күштің бірігуі – Әділетті әрі прогрессивті Қазақстан құру жолындағы маңызды қадамдардың бірі. Бұл шешім елдің тұрақты дамуына бағытталған реформаларды тиімді жүзеге асыруға мүмкіндік береді. Сондай-ақ ортақ құндылықтар мен ұлттық мүдде төңірегінде топтасқан саяси күштердің әлеуетін арттыруға ықпал етеді. Съезд барысында қабылданған шешімдер партияның алдағы кезеңдегі басым бағыттарын айқындап, қоғамдағы өзекті мәселелерді шешуге бағытталған жұмыстардың жалғасатынын көрсетті. Делегаттар елдегі саяси жаңғыру үдерістеріне қолдау білдіріп, халықтың әл-ауқатын арттыруға бағытталған бастамаларды бірлесіп жүзеге асырудың маңызын атап өтті.
