Полиция полковнигі «Құрмет» орденімен марапатталды

Оңтүстік Қазақстан облыстық ІІД Шымкент қалалық Ішкі істер басқармасы Қаратау аудандық полиция бөлімінің бастығы полиция полковнигі Қуатов Сәбит Жамалұлы мемлекетіміздің құрметті марапаттарының бірі – «Құрмет» орденімен марапатталды. Бұл департамент тарихында бұрын-соңды ешкім алмаған мәртебесі жоғары алғашқы орден.
Кеше департаменттің кіші залында болып өткен салтанатты марапаттау рәсіміне жеке құрам қызметкерлерімен қатар облыстық Ауған соғысы ардагерлері қауымдастығының мүшелері қатысты.
Жиынды ашқан Департамент бастығы полиция полковнигі Жанат Қуанышұлы Сүлейменов, ҚР Президентінің Жарлығы оқылғаннан соң полиция полковнигі Қуатов Сәбит Жамалұлының кеудесіне «Құрмет» орденін тағып, өзінің құттықтауын жеткізді. Сондай-ақ, салтанатты рәсімде сөз алған ОҚО Ауған соғысы ардагерлері қауымдастығының төрағасы Серғали Ешімханұлы Рысбеков, Қуатов Сәбит Жамалұлы Қарағанды милиция мектебінің 3 курсында оқып жүріп КСРО Министрлер кеңесінің қаулысымен Кеңес одағы қарулы күштерінің қатарында Кавказ тауларындағы Қарабақ аймағына аттанғанын және сол жақта жүріп қатерге толы қызметін мінсіз атқарып ерлік танытқаны үшін «Совет милициясының үздігі» төсбелгісімен марапатталғанын атап өтті.
Қуатов Сәбит Жамалұлы  1964 жылы оңтүстік өңірінің Ордабасы ауданында туып-өскен. 1985 жылдан басталған Ішкі істер органдарындағы қызмет жолы барысында ОҚО ІІБ Ұйымдасқан қылмысқа қарсы күрес басқармасының аға жедел уәкілі, Әл-Фараби аудандық ІІБ қылмыстық іздестіру бөлімшесінің аға жедел уәкілі, Шымкент қалалық ІІБ 2-ПБ криминалдық полиция бөлімшесінің бастығы, ОҚО ІІБ Криминалдық полиция басқармасының бөлім бастығы, Шымкент қалалық ІІБ Абай полиция бөлімінің бастығы, ОҚО ІІД Криминалдық полиция басқармасының бастығы қызметтерін атқарған. 2016 жылдың мамыр айынан Шымкент ҚІІБ Қаратау аудандық полиция бөлімінің бастығы лауазымында.
Айтып өтейік,  Қуатов Сәбит Жамалұлы Қарабақ таулы аймағындағы соғыс қақтығыстарына қатысқаны үшін 2010 жылдың желтоқсан айында ҚР Президентінің Жарлығымен ІІ дәрежелі «Айбын» орденімен марапатталған.