Шымкенттік ата-аналар жаңадан ашылған №2 Оқушылар сарайының жұмыс барысымен танысты. Ұлттық ерекшеліктер мен цифрлы тенденцияны ұйыстырған орталықта 53 үйірме жұмыс жасауда. Бірегей нысанды өзгелерден айшықтайтыны – өнер, спорт, тілдік үйірмеден бөлек, ғылымға негізделгені. Яғни, заманауи құрылғымен жабдықталған зертханалар жас ғалымдарды тәжірибе алаңына топтастырып, теорияны практикамен пысықтап отырады. Оқышылар сарайының ашылғанына 2 айға жуық уақыт өткенімен, 2500-ден аса бала тіркеліп, таңдауына қарай түрлі үйірмелерге қатысып жатыр. Орталықпен аталған нысанның директоры Данияр Егізбаев таныстырды.
Баланың дарынын дамытып, шығармашылығын шыңдауда үйірмелер мен қосымша білім орталықтарының маңызы зор. Мегаполисте мұндай жерлер жетіп артылады. Дегенмен, түрлі бағыттағы үйірмелерді бір орыннан табу қиын. Ал, қала күні қарсаңында ашылған жаңа Оқушылар сарайы 60-қа жуық сала бойынша балалармен жұмыс істейді. Жаңа орталықтың жұмысы жұртшылыққа әлі де беймәлім болғандықтан мекеме басшылығы ата-аналар үшін ашық есік күнін өткізді.
Тоғыз жүз мың шаршы метрді алып жатқан үш қабатты ғимаратта оқушылар үшін ғылыми-техникалық, спорт және сауықтыру, гуманитарлық, көркем-эстетикалық бағытқа топтасқан 53 үйірме істеп жатыр. Иә, орталықтың басқалардан ерекшелігі — ғылыми бағытқа баса мән берген. Практикалық физика, химия, биотехнология кабинеті мен бағдарлама жасау, автоматика, дизайн және 3Д модельдеу, ЛЕГО құрылысы, ұшақты модельдеу үйірмелері ғылыми бағытқа бет бұрған оқушылар үшін тәжірибе алаңы болмақ.
Ерекше балалар үшін де барлық жағдай жасалған. Спорт үйірмесінде арнайы бассейн болса, гуманитарлық салада қимыл-қозғалысы, тілдік дағдыларымен жұмыс істейтін кәсіби маман және жаңа үлгідегі құрал-жабдықтар бар.Спорт секторындағы жаттықтырушылар кәсіби спорт шеберлері. Мекеме басшысы негізгі сұраныстың бірі – бассейн екенін айтады. Бассейн күніне 400 балаға қызмет етуге қауқарлы. Бастысы, орталықтағы барлық үйірме ақысыз. Оқушылар сарайы тәулігіне 4 ауысымда жұмыс істеп, 7-18 жас аралығындағы 2000 баланы түрлі үйірмеге қабылдай алады. Цифрлылықтың тағы бір көрсеткіші ретінде үйірмеге тіркеуді айтуға болады. Ата-ана құжатты орталыққа емес, «Миндаль KZ» электронды сайт арқылы тіркейді. Мұндай орталықтың мегаполисте әзірге баламасы жоқ. Гуманитарлық бағыт бойынша көзге түскен тағы бір ерекшелік – медиа орталық, дыбыс жазу, мобилография, СММ-ге арналған фото-видео сыныбы мен дебат клубы болды. Жастардың медиасыныпқа деген қызығушылығы да ерекше.
Орталық — ұлттық өнерге де ерекше мән берген. Сәндік-қолданбалы, бейнелеу, вокал, қыш жасау, қолөнер үйірмелері жұмыс істейді. Тігін тігіп, ою-өрнек салуды, түрлі әшекей бұйымдарын үйренуге қызыққан қыз балалар көп.
№2 оқушылар сарайына басқа мекеменің үйірмесіне жазылған балалар қатыса алмайды. Себебі, миллионды қаланың жас балаларын шеттетпей, мүмкіндігінше барлығын қамту. Шаһарда алдағы 3 жыл ішінде дәл осындай 4 нысан салынбақ.
