Жөнсіз жазу жойылды

Бүгінгі көз көріп жүрген Дендросаябақ бірден мұндай кейіпке ене қойған жоқ. 30 жылдан кейін күрделі жөндеуден өткен демалыс орнының бүгінгі шырайлы келбетін бұзбау, саясына сан мың адамды сыйдырған саябаққа келушілердің қатарын көбейту – басты талап. Жақсылықты бөліссең – көбейеді. Демалыс аймағындағы жақсы істерді жариялаумен бірге, кемшін тұстарын да айтып, оң шешілуіне ықпал ету — негізгі жұмыс. Біраз уақыт бұрын саябақтың жер асты өткеліндегі жастардың жөнсіз бассыздығын көріп, жауапты орындарға жеткізген болатынбыз. Араға уақыт салып, тағы да барып қарасақ, баяғы жартас сол жартас.Күнделікті келушілердің назарына іліккен жазудың әлі күнге дейін неліктен  өшірілмей жатқандығын А.Асқаров атындағы Дендрологиялық саябақ директоры Ғани Әжединұлынан  сұрап көрдік. Ол: «Басшылыққа жақында келгендігін, бұл мәселені бүгін шешетіндігін»,- айтты.Иә, жаңа басшы осылай дей сала  артынша сол жердегі қызметкерлер келіп, айға жуық уақыттан бері тұрған жазуды өшіре бастады. Нәтижесінде өтпелі жолдағы түрлі-түсті, түсініксіз сөздер өшіп, алғашқы ақ кейпіне енді.

 Сәулетті қала атанған шаһардың сәнін құртып, мәдени астанада мәдениетсіздік танытпай,  миллион тұрғыны бар қаланы одан әрі гүлдендіріп, көріктендіру осы жердің барлық тұрғындарына міндетті іс.

Айғақ — ақпарат