Шымкенттік екі оқушының 4 жылдық еңбегі халықаралық аренаға жол ашты. Олар жүздеген қатысушы бақ сынаған республикалық робототехника олимпиадасында үздіктер қатарынан көрініп, енді Қазақстанның намысын Үндістанда қорғамақ. Жас өнертапқыштар бұл жетістікке қалай жетті? Толығырақ бейне сюжетте.
Алматы қаласында өткен “World Robot Olympiad ALMATY 2026” республикалық робототехника олимпиадасында шымкенттік оқушылар жоғары нәтиже көрсетті. RoboPark робототехника мектебінің тәрбиеленушілері Алмасбек Ерден мен Сейдахмат Маруф Robo Challenge санатында 170 ұпайдың 164-ін жинап, республикалық кезеңнің күміс жүлдегерлері атанды. Бұл нәтиже оларға халықаралық чемпионатқа жолдама сыйлады.
Жас робототехниктердің бұл жетістігі кездейсоқ келген жоқ. Оқушылар RoboPark мектебінде төрт жылдан бері білім алып келеді. Осы уақыт ішінде олар бағдарламалау, инженерлік жобалау және робот құрастыру бағытында тәжірибе жинақтап, түрлі жарыстарға қатысқан. Команданы халықаралық деңгейдегі додаға жаттықтырушы Муваххид Абрахимов дайындаған.
Қыркүйек айында шымкенттік команда Үндістанның Хайдарабад қаласында өтетін World Robot Olympiad Open Championship халықаралық чемпионатына қатысады. Бұл жарыс әлемдік финалға апарар маңызды кезеңдердің бірі саналады. Мамандардың айтуынша, оқушылардың жетістігі Шымкентте робототехника мен STEM білім беру бағытының қарқынды дамып келе жатқанын көрсетеді. Қазір команда халықаралық додаға дайындық жұмыстарын бастап кеткен.
