Сөз барымтасының саңлақтары Шымкентте бас қосты. Қала күні мерекесіне орай ұйымдастырылған «Шырайлы, шежірелі, құтты мекен» атты республикалық ақындар айтысында еліміздің әр өңірінен келген дүлдүлдер жырдан шашу шашып, көрерменге ерекше рухани кеш сыйлады. Шымкентте Қала күні мерекесі аясында ұлттық өнерді ұлықтаған айтулы рухани кеш өтті. Шымкент қаласы әкімдігінің қолдауымен ұйымдастырылған «Шырайлы, шежірелі, құтты мекен» атты республикалық ақындар айтысы биыл екінші жыл қатарынан өткізіліп, жыр сүйер қауымның басын қосты. Қазақтың төл өнерін насихаттап, сөз құдіретін дәріптеуді мақсат еткен дүбірлі додаға еліміздің түкпір-түкпірінен танымал айтыскер ақындар арнайы келді. Жалпы саны 12 ақын алты жұп болып өнер көрсетіп, көрерменге тартысты да тағылымды айтыс сыйлады. Суырыпсалма өнердің саңлақтары елдік пен бірлікті, туған жердің тарихы мен бүгінгі тыныс-тіршілігін жырға қосып, қоғамдағы өзекті мәселелерді де назардан тыс қалдырмады.
Жыр додасының шымылдығын Қазақстан Республикасының Еңбек сіңірген қайраткері, «Құрмет» және «Парасат» ордендерінің иегері, белгілі айтыскер ақын Аманжол Әлтай ашып, айтысты жоғары деңгейде жүргізіп отырды. Оның шебер жүргізушілігі мен көрерменмен етене байланысы рухани кештің мазмұнын байыта түсті. Ал қазылар алқасына Қазақстанның халық жазушысы, қазақ айтыс өнерінің абызы Жүрсін Ерман төрағалық етті. Айтыстың әділ бағалануына белгілі ақын-жазушылар мен мәдениет саласының майталмандары атсалысты. Кеш барысында ақындар Шымкенттің өткені мен бүгініне тоқталып, шаһардың әлеуметтік-экономикалық дамуы, мәдени әлеуеті мен тарихи тамыры туралы әсерлі ой өрбітті. Сондай-ақ, қаланың шырайлы келбеті, тұрғындардың ауызбіршілігі мен елдің болашағына деген сенімі жырға арқау болды.
Көрермендер әр жұптың айтысын зор ықыласпен қабылдап, ақындардың тапқыр әзілдері мен өткір ойларына қошемет көрсетті. Ұлттық өнерге деген халықтың құрметі мен қызығушылығының жоғары екені тағы бір мәрте байқалды. Айтыс қорытындысы бойынша үздік деп танылған ақындар арнайы марапатталып, ұйымдастырушылар тарапынан бағалы сыйлықтар табысталды. «Шырайлы, шежірелі, құтты мекен» атты республикалық ақындар айтысы – қазақтың ғасырлар бойы жалғасып келе жатқан сөз өнерін дәріптеп қана қоймай, ұлттық құндылықтарды насихаттауға, жас ұрпақтың рухани тәрбиесіне серпін беретін маңызды мәдени шаралардың біріне айналып отыр.
