Қазақстан мұсылмандары Діни басқармасы барлық өңірге ортақ ас берудің дастархан мәзірін әзірледі. Арнайы тізім Астанада өткен имамдар форумында қаралып, мүфтияттың ресми құжаты ретінде бекітілді.
Соңғы уақытта қаралы жиындардағы ас беру бәсекеге айналып барады. Ал ислам дінінде «жеңдер, ішіңдер, бірақ ысырап етпеңдер» делінген. Осыны негізге ала отырып, дастархан бірізділендірілмек.
Имамдар мен ғалымдардың пікірінше, үстелде тәтті бәліш, жеміс-жидек, салат сынды тағамдар болмағаны жөн. Рұқсат етілген әрі ұсыныс ретінде жасалған мәзірге 6 ас енді. Олар келесідей. Нан өнімдерінен бауырсақ пен шелпек. Шәй мен су. Ыстық тағамнан ет немесе күрішті, яғни палауды таңдауға болады. Сондай-ақ тізімде сары май, тары, талқан, қант пен кәмпит бар.
«Адамдар жағдайына қарамай ысырапшылдыққа жол беріп жатады. Әсіресе жиындарда отырған кезде көріп жатамыз астың мәзірі тойдағы ас мәзірінен еш айырмашылығы болмай қалды. Жалпы, осы жаназаға жиналған жиындарда ысырапшылдыққа берілмеу керек. Ол жердегі негізгі мақсат – келген адамды күтіп алып, тамақтандыру ғана, ал артық мәзірлерге жол жоқ»,- деді СҚО-ның бас имамы Хамзат Әділбеков.
Өңірдің дін қызметкерлері ысырапшылдықты болдырмау мақсатында бекітілген ережелер мен ас мәзірін жамағатқа жеткізу үстінде. Бұл ас беру кезінде аста-төк дастарханның жайылуына тосқауыл болмақ.
