ЖАС МАМАНДАРДЫ ҚОЛДАУ ЖАЛҒАСУДА

Шымкентте медицина саласының болашағына бағытталған маңызды жиын өтті. Бұл халықаралық конференция «Медициналық колледждер мен денсаулық сақтауды дамыту ұйымдарының ынтымақтастығы» тақырыбы аясында ұйымдастырылған.

Аталмыш жиында заманауи талаптарға сай білікті мамандар даярлау, кадр сапасын арттыру және оларды салаға тиімді енгізу жолдары талқыланды.
Халықаралық конференцияның мақсаты медициналық білім беру ұйымдары мен денсаулық сақтау жүйесі арасындағы өзара байланыс пен серіктестікті нығайту. Сонымен қатар, білім алушыларға сапалы білім беріп, саналы әрі білікті маман даярлау.Айта кетсек, ауқымды шараға Қырғызстан, Тараз және Шымкент қалаларынан келген 25-тен астам медициналық білім беру ұйымдары мен денсаулық сақтау саласының өкілдері қатысты.

Аталмыш шараға студенттер де қатысып, өз білімін толықтырды. Конференция барысында медициналық кадрларды даярлаудағы заманауи талаптар, медицина қызметкерлерінің кәсіби этикасы және жас мамандарды қолдау мәселелері жөнінде баяндама оқылды. Сондай-ақ қатысушылар саладағы өзекті тақырыптар бойынша өзара тәжірибе алмасты.
Айта кетейік, бұл шара Шымкент қалалық денсаулық сақтау басқармасының ұйымдастыруымен «№2 қалалық аурухана» базасында өтті.
Конференция еңбек нарығы мен білім беру жүйесі арасындағы үйлесімділікті насихаттады. Сонымен қатар Іс-шара барысында медициналық ұйымдар арасында өзара әріптестік байланыстар орнатылды.