Шымкентте инстаграм желісінде радикалды топтарға жазылған 556 жасөспірім анықталды. Бұл ақпарат кезекті қоғамдық кеңес отырысында талқыланған болатын. Биыл мұндай жағдайлардың алдын алу бойынша қала аумағында 4926 ақпараттық-түсіндіру шарасы жүргізілген. Мақсат діни экстремизм мен радикалды идеологияның алдын алу.
Алқалы жиында дін істері басқармасының басшысы Серғазы Кәрімұлы мінберге шығып, атқарылып жатқан жұмыстардың барысын баяндады. Оның айтуынша, кәмелет жасына толмағандар арасында радикалды топтардың парақшаларына жазылу деректері бойынша арнайы жұмыстар жүргізілген. Нәтижесінде 462 кәмелетке толмаған жасөспірім күмәнді аккаунттардан шығарылды, ал қалғандарына қатысты зерделеу жұмыстары жалғасуда.
Қоғамдық кеңестегі кезекті мәселе энергетика және инфрақұрылымды дамыту бағытында атқарылған жұмыстар таныстырылды.
Атап өтсек, ауыз сумен қамту бойынша қазір 81 елді мекеннің 80-і сапалы ауыз сумен қамтамасыз етілген. Кәріз жүйесіне келсек, 81 шағын ауданның 26-сы ғана кәрізге қосылған, ал 55 шағын аудан әлі жүйеге кірмеген.
Табиғи газ бойынша қаладағы 81 елді мекеннің 60-ы толық газбен қамтылған. 20 елді мекен тұрғындары жартылай, яғни жекеменшік желі арқылы газ пайдаланады.
Келесі кезекте мінберге Мемлекеттік сатып алу басқармасының басшысы Бауыржан Қабылбекұлы шығып, 2025 жылғы атқарылған жұмыстарды баяндады. Веб-портал деректеріне сәйкес, сатып алу жылдық жоспарының жалпы сомасы 626 млрд теңге көлемінде бекітілген. Атап айтқанда басқармамен бірыңғай ұйымдастырушы ретінде 417,7 млрд теңгеге 1 777 лот бойынша конкурс жариялаған.
Аталған шаралар қала тұрғындарының тұрмыс сапасын жақсартуға бағытталған.
Олар әлеуметтік тұрақтылықты қамтамасыз етіп, қала инфрақұрылымын дамытуға мүмкіндік береді.
