Тәшенев университетінің базасында жаңа оқу корпусы ашылды. Білім мен еңбекті ұштастырған Социалистік Еңбек Ері Жұмагүл Сәуірбаеваның есімі енді жас буынға шабыт сыйлайды. Бұл — студенттердің білім мен ғылымға, шығармашылық пен спортқа жол ашқан жаңа кеңістік.
Жаңа корпус – заманауи инфрақұрылыммен қамтылған төрт қабатты нысан. Жалпы ауданы 3400 шаршы метр. Мұнда интерактивті тақталар орнатылған 25 аудитория, спорт және акт залы, кітапхана мен электронды ресурстық орталық бар.
Жақын уақытта IT және нанотехнология зертханалары іске қосылып, студенттерге тәжірибелік білім алуға жол ашылады.
Оқу ғимаратына Жұмагүл Сәуірбаеваның есімін беру арқылы еңбектің қадірін дәріптеп, студенттерге үлгі болу көзделген. Тарихы Сырдария университетінен бастау алатын бұл оқу орнында еңбек ардагері Жұмагүл Сәуірбаеваның еңбегі ерекше.
Бүгінде сол ізгі дәстүрді жалғаған Tashenev University ұжымы білім мен ғылымды ұштастырып, жаңа белеске қадам басты. Алдағы уақытта мұнда ғылыми жобалар мен инновациялық зерттеулерге басымдық берілмек.
Бүгінде университетте 11 мыңнан астам студент білім алады.
62 бакалавриат және 12 магистратура бағдарламасы жүзеге асырылуда. Халықаралық деңгейде бәсекеге қабілетті мамандар даярлауға басымдық беріп келе жатқан оқу ордасы Шымсити шағынауданынан 26 мың студент білім алып, ғылыммен айналысатын жаңа кампус салуды жоспарлап отыр. Ерен еңбегімен елге танылған азаматтардың есімін білім ордаларына, көше атауларына беру — қоғам санасында еңбек адамының бейнесін қалыптастырудың бір жолы.
Бұл – жас ұрпаққа өнеге, ұлт рухын биіктетудің жарқын көрінісі.
