Шымкентте археология саласында айтулы оқиға орын алды. Белгілі ғалым Александр Подушкиннің «Каңлы мемлекеті. Археологиялық деректер негізінде» атты көлемді монографиясының тұсаукесері өтті. Бұл еңбек – Каңлы мемлекетінің тарихын жаңа қырынан танытатын маңызды ғылыми кітап. Шараға алыс-жақын шетелдерден тарихшы-ғалымдар, профессорлар мен зерттеушілер қатысты. Олар еңбектің археологиялық және тарихи тұрғыдан маңыздылығын атап өтті. Кітапта Каңлы мемлекетінің саяси құрылымы, мәдениеті мен шаруашылығы археологиялық деректер негізінде жан-жақты зерделенген.
Александр Подушкин — ұзақ жылдар бойы Қазақстан аумағындағы көне ескерткіштерді зерттеп келе жатқан ғалым. Бұл еңбегі оның көпжылдық зерттеулерінің қорытындысы іспетті . Іс-шара барысында монографияның тұсауы кесіліп, кітап авторына дәстүрге сай шапан жабылды. Ал еңбектің алғашқы данасы университет ректоры Әлібек Нұртаевқа табыс етілді. Шараға онлайн форматта да түрлі елдердің ғалымдары қатысып, өз пікірлерімен бөлісті. «Каңлы мемлекеті» атты монография – археология саласындағы тың ізденістер мен зерттеулердің нәтижесі. Ғылыми еңбек Каңлы өркениетінің әлемдік тарихтағы орнын айқындап, қазақ археологиясының көкжиегін кеңейте түсті.
