Ағайынды Махмуд пен Терехан Сабырхан туған елге оралды. Әлем чемпионатында атой салып, көк туымызды желбіретіп, Әнұранымызды асқақтатқан боксшыларды оңтүстік жұрты қошеметпен қарсы алды. Байрақты бәсекеде тақымын қысып отырған жанкүйерлері батырларын әуежайдан күтіп алып, елім деген ерлерін көкке көтерді.
Шаршы алаңдағы санаулы минуттар. Лезде өте шыққанымен, оның артында спортшының жылдар бойғы еңбегі, елдің абыройы тұр. Ливерпульде өткен бокстан әлем чемпионатында Қазақстан құрамасы алдыңғы қатардан көрінді. Қоржынға алтынды салған чемптондардың қатарында ағайынды Сабырхандар бар. Бір үйдің қос батырын кеше мегаполис жұртшылығы құрмет-қошеметпен қарсы алды. Салтанатты жиынға Шымкент қаласы әкімінің орынбасары Сәрсен Құранбек, спорт мектептерінің басшылары мен жаттықтырушылар, жанкүйерлер, туған-туыстары және жерлестері қатысты. Ел намысын қорғап, көк байрағымызды биікте желбіреткен қос чемпионға деген халықтың ықыласы ерекше болды. Қос бауырдың есімі қазақ спортының тарихында алтын әріппен жазылатыны анық.
Елдің ыстық ықыласына бөленген жеңімпаздар бұл жеңіспен тоқтап қалмай, алдағы жарыстарға тиянақты түрде дайындалатындарын жеткізді. Махмуд Сабырхан 55 келі салмақта финалға шығып, испаниялық боксшыны айқын басымдықпен жеңіп, әлем чемпионы атанды. Осылайша, ол 2023 жылы Ташкентте жеңіп алған алтын медалін тағы бір алтынмен толықтырып, екі дүркін әлем чемпионы мәртебесіне ие болды.
