Шымкент қаласында қоғамға ой саларлық игі іс-шара өтті. ҚМДБ Шымкент қаласы өкілдігінің ұйымдастыруымен “Өткенге құрмет – тіріге міндет” атты тазалық акциясы ұйымдастырылды. Шараға қала әкімдігі қолдау көрсетіп, жамағатты бір мақсатқа жұмылдырды. Игі бастама ата-бабамызға деген құрметті арттырып, жас ұрпаққа тағылымды тәрбие беруді көздейді. Қазіргі таңда Шымкент қаласында 102 мазарат бар. Соның 80-і – мұсылман зираттары. Ал Қаратау ауданының өзінде 22 мазарат орналасқан. Бұл қасиетті орындарды таза ұстау – өткенге құрмет көрсетудің, болашаққа өнеге қалдырудың бір жолы. Акция аясында қала тұрғындары мен мешіт жамағатынан құралған 8 мыңға жуық адам бір кісідей атсалысты. Олар мазараттарды қоқыстан тазартып, айналаны ретке келтірді.
Сондай-ақ, қоршауларды жөндеп, жасыл желектерді күтіп-баптау жұмыстары да жүргізілді. Бұл – қоғамда бірлік пен ынтымақтың бар екенін көрсететін айқын мысал. Шымкент қаласы әкімдігінің қолдауымен өткен бұл шара жыл сайын екі рет ұйымдастырылады. Дәстүрге айналған тазалық акциясы тұрғындарды ортақ іске жұмылдырып қана қоймай, туған жердің рухани құндылықтарын сақтауға үлес қосады. “Өткенге құрмет – тіріге міндет” атты тазалық акциясы – тек қана қоршаған ортаны таза ұстау емес, халықтың рухани бірлігін бекемдей түсетін дәстүрлі шара. Мұндай бастамалар алдағы уақытта да жалғасын табатынына сенім мол.
