Шымкентте өнер ордасы ерекше басқосуға куә болды. Қалада алғаш рет бейнелеу өнеріне арналған халықаралық семинар ұйымдастырылды. «Көркемдік және кәсіптік оқытудың заманауи тәсілдері» тақырыбындағы жиынға еліміздің танымал суретшілерімен бірге шетелдік сарапшылар да қатысып, өз тәжірибелерімен бөлісті. Бұл – бейнелеу өнері бағытында өткізіліп отырған алғашқы халықаралық басқосу. Семинарға шет мемлекеттерден, сондай-ақ Астана мен Алматыдан келген онға жуық маман қатысты. Олар бейнелеу өнеріндегі соңғы жетістіктерді ортаға салып, жас буынға білім берудің жаңа әдістерін талқылады. Сонымен қатар, бүгінгі таңда шығармашылық салада туындап отырған өзекті мәселелер де назардан тыс қалған жоқ.
Жиын Ә. Қастеев атындағы өнер және дизайн колледжінің ұйымдастыруымен өтті. Колледж ұжымы халықаралық байланыстарды нығайтып, студенттердің кәсіби шыңдалуына жол ашуды мақсат тұтады. Сарапшылардың айтуынша, өнерді дамытудағы басты бағыт – теорияны тәжірибемен ұштастыру. Яғни, жас суретшілердің қабілетін жаңа технологиялармен, заманауи әдістермен үйлестіру. Алғаш рет ұйымдастырылған бұл халықаралық семинар шығармашылық ортаға тың серпін берді. Сарапшылардың пікірінше, мұндай шаралар бейнелеу өнеріндегі кәсіби оқытудың сапасын арттырып қана қоймай, жас таланттардың қанатын кеңге жаюына жол ашады.
