ЖОЛДАУ МІНДЕТТЕРІ ЖҮЗЕГЕ АСЫРЫЛУДА

      Мемлекет басшысы 2024 жылдың қыркүйегінде жариялаған жолдауында бірқатар маңызды тапсырмалар жүктеді. Әсіресе халықты әлеуметтік қолдау мәселесіне ерекше мән берілген. Осыған орай Шымкентте өткен брифингте қала әкімінің орынбасары атқарылған жұмыстарды баяндады. Сонымен бірге өңіраралық жәрмеңкеде 1800-ден астам тұрақты жұмыс орны ұсынылған.

     2025 жыл елімізде жұмысшы мамандықтары жылы болып жарияланды. Осыған сәйкес Шымкент қаласында да ауқымды шаралар атқарылуда. Соның бірі – бос жұмыс орындары жәрмеңкесі. Мұнда қаладағы ірі, орта және шағын кәсіпорындардан 160 жұмыс беруші 1800-ден астам тұрақты бос жұмыс орнын ұсынды. Сонымен қатар 227 мекемеден 1500-ден астам уақытша жұмыс орны бар. Жәрмеңкеге негізінен жоғары оқу орындарының түлектері, арнаулы орта кәсіптік білім беру ұйымдарының студенттері, 9-11 сынып оқушылары және жұмыссыз азаматтар қатысқан.

     Мемлекеттік атаулы әлеуметтік көмек табысы аз азаматтарға кешенді қолдау көрсетуді көздейді. Бұл бағытта аз қамтамасыз етілген отбасыларға ақшалай төлемдер беріледі. Сонымен қатар жұмыспен қамтуға жәрдемдесу шаралары қарастырылған. Оған оқыту, жастар практикасы, қоғамдық және әлеуметтік жұмыстар, гранттар мен тұрақты жұмыс орындарына жолдама кіреді. Сондай-ақ бір жастан алты жасқа дейінгі балаларға әрқайсына ай сайын 5898 теңге көлемінде қосымша төлем тағайындалады.

     Сонымен қатар Қазақстанда пилоттық жоба жүзеге асырылуда. Ол Шымкент қаласы мен Қарағанды облысында отбасылардың әл-ауқат деңгейін баллдық үлгімен анықтауға негізделген. Жоба аясында білім беру, әлеуметтік қорғау, тұрғын үй және спорт саласында мемлекеттік қызметтер көрсетіледі. Жаңа тәсіл республикалық төлемдерді сақтай отырып, мұқтаж азаматтарға қосымша қолдау көрсетуге мүмкіндік береді.

     Қала әкімінің орынбасары Скорингтік үлгіні енгізу республикалық бюджеттен төленетін әлеуметтік төлемдерге әсер етпейтінін атап өтті. Барлығы 41 түрлі жәрдемақы бұрынғыдай сақталады. Оған зейнетақылар, бала күтімі бойынша төлемдер, көпбалалы және марапатталған аналарға, мүгедектік пен асыраушысынан айырылу бойынша жәрдемақылар кіреді. Сондай-ақ атаулы әлеуметтік көмек те өзгеріссіз беріледі.