Қазақстан – ядролық арсеналдан өз еркімен бас тартқан тұңғыш мемлекет ретінде әлем тарихында айрықша орын алды. 1991 жылғы 29 тамызда сол кездегі Президент Жарлығымен Семей полигоны жабылып, ел тәуелсіздігі тарихындағы тағдырлы шешімдердің бірі қабылданды. Бұл қадам тек ел үшін ғана емес, бүкіл әлем үшін антиядролық қозғалыстың бастауына айналды. Осыған орай, жыл сайын 29 тамыз – Ядролық сынақтарға қарсы халықаралық күн ретінде аталып өтеді. Бұл мерекелік күнді Біріккен Ұлттар Ұйымы 2009 жылы ресми түрде белгілеп, жаһандық қауымдастыққа бейбітшілік пен қарусыздану жолындағы Қазақстан бастамаларының маңызын айқындап берді. Шымкент қаласында да осы атаулы датаға орай арнайы іс-шара ұйымдастырылды.
Жиынға ардагерлер, қоғам қайраткерлері, жастар және қала тұрғындары қатысты. Алдымен Кеңес Одағының батыры Сабыр Рақымовтың ескерткішіне гүл шоқтары қойылып, тарихи тұлғаларға тағзым жасалды. Қатысушылар бір минут үнсіздікпен отан қорғаған батырлар мен ядролық сынақ құрбандарын еске алды. Іс-шара барысында ардагерлерге құрмет көрсетіліп, түрлі алғыс хаттар мен мақтау қағаздары табысталды. Сөз сөйлеген қонақтар Қазақстанның ядролық қарусыздану жолындағы батыл шешімдері мен әлемдік қауіпсіздікке қосқан үлесін атап өтті. Сондай-ақ жастарға бейбітшілікті сақтау мен отансүйгіштікке тәрбиелеудің маңызы ерекше екені айтылды. Бұл шара – өткенге тағзым етіп қана қоймай, келер ұрпаққа бейбіт өмірдің қадірін ұғындыруға бағытталған дәстүрлі кездесу. Шымкентте жыл сайын өтіп тұратын бұл мерекелік жиын бейбітшілік пен тұрақтылықтың ұлы құндылық екенін тағы бір мәрте дәлелдеді.
