Елімізде дәрілік заттарды таңбалау мен қадағалау жүйесі 2024 жылдың 1 шілдесінен бастап енгізілген болатын. Жаңа қадағалау тетігі дәрінің зауыттан бастап дәріханада сатылуына дейінгі бүкіл жолын қамтиды. Бұл дәрі-дәрмек қауіпсіздігін қамтамасыз етуге, сапасын бақылауға және жалған өнімдердің заңсыз айналымына тосқауыл қоюға бағытталған маңызды қадам. Игі бастама бүгінде кезең-кезеңімен іске асырылуда.
Енді дәрі-дәрмектің түпнұсқалылығын сканерлеу арқылы көре аласыз. Былтырғы жылдан бастап денсаулық сақтау министрлігі жаңа заңды қолданысқа енгізді. Осы уақыттан бері 512 млн қаптама дәрілік заттар таңбаланса, оның ішінде былтыр өндірілген — 483 млн дәрілік зат таңбаланған. Бүгінгі күнге айналымда 361 млн таңбаланған дәрілік заттар бар. Заңнамаға сәйкес әрбір дәрінің қаптамасында цифрлық код болуы тиіс. Мақсат – жалған дәрілермен күрес. Яғни база дәрінің қайда, қашан шыққанын бақыламақ. Демек, зауыттан дәріханаға, сосын тұтынушыға дейін қадағаланатын болады.
Жүйе былай жұмыс істейді. Алдымен өндіруші арнайы кодты алады да, оны дәрінің қаптамасына жапсырады. Сол кезде ақпарат жүйеге тіркеледі. Кейін бұл дәрі импорттаушы мен дистрибьюторға өтеді. Егер код дұрыс болмаса немесе мүлде жоқ болса, ондай дәрі сатылмайды.
