Елімізде жер сілкінісі жиі тіркелетін өңірлердің қатарында Шымкент алғашқы үштікте. Миллионнан астам тұрғыны бар қала үшін бұл — үлкен қауіп. Осы қатердің алдын алу мақсатында Шымкентте төтенше жағдайлар қызметкерлерінің қатысуымен “Жер-2025” республикалық оқу-жаттығуы өткізілді. Мақсат— республика көлемінде зілзаланың алдын алу шараларына назар аудару, жауапты қызметтердің үйлесімді жұмысын пысықтау. Сонымен қатар, іс-шара аясында ұйымдастырылған көрмеде 20-ға жуық компания заманауи құтқару техникасы мен құрал-саймандарын көпшілік назарына ұсынылды.
«Жер-2025» республикалық командалық-штабтық оқу-жаттығуы — жойқын жер сілкіністерінің алдын алу мақсатында ұйымдастырылған кешенді шара. Аталмыш шара ҚР Төтенше жағдайлар вице-министрі, генерал-майор Рамиль Камаловтың басшылығымен басталды. Конференция түрінде бастау алған шарада төтенше жағдай кезіндегі жедел қызметтердің іс-қимыл мен үйлестіру машықтары алдын алу шаралары пысықталды. Жиында мәлім болғандай, еліміздің 9 өңірінде 23-24 шілде аралығында жер сілкінісі қауіпінің алдын алу бағытында тиісті дабылдар қағылып, халықты құлақтандыру жұмыстары жүргізіледі.
Оқу-жаттығудың жалғасы ретінде төтенше жағдайлар қызметінің техникалық мүмкіндіктері таныстырылған көрме өтті. Онда өрт сөндіру автокөліктері, заманауи дрондар, құтқару құралдары және түрлі қорғаныс жабдықтары көпшілік назарына ұсынылды. Айта кетейік, қазіргі таңда Шымкентте зілзаладан зардап шеккен тұрғындарды уақытша орналастыру үшін жалпы сыйымдылығы 4 200 адамға дейін жететін шатырлы қалашық құрылды. Сондай-ақ қалада қазіргі таңда 10 өрт сөндіру бөлімі жұмыс істейді. Жақын арада тағы 5 бөлім қосылмақ.
Екі күнге жалғасатын «Жер-2025» оқу-жаттығуы — төтенше жағдайлар кезінде тиімді әрекет етуге бағытталған ауқымды жоба.Жаттығу арқылы қызметтер арасында өзара іс-қимыл нығайып, тұрғындардың қауіпсіздігі басты назарда болады.
