Туризм мамандары – Шымкентте бас қосты. Үшінші мегаполисте соңғы жылдары туризм саласы қарқынды дамып, қалаға келетін туристердің саны айтарлықтай артқан. Осы үрдісті одан әрі дамыту мақсатында Visit Shymkent туристік ақпараттық орталығының ұйымдастыруымен оқыту семинары басталды. Шара аясында шетелден арнайы шақырылған туристік сала мамандары тәжірибе бөлісуде. Қонақжай қалада қонақ үй, мейрамхана әкімшілеріне және гид-экскурсоводтарға арналған үш күндік оқу семинары өтіп жатыр. Туристік индустрияда тәжірибесі мол, танымал мамандар қатысушыларға теориялық әрі практикалық сабақтар мен шеберлік сағаттарын өткізуде. Семинардың басты ерекшелігі — шетелден келген халықаралық деңгейдегі жаттықтырушылардың тікелей қатысуы. Атап айтқанда, АҚШ, Түркия, Украина, Қырғызстан, Өзбекстан және Ресей елдерінен келген кәсіби жаттықтырушылар өз тәжірибесімен бөлісуде.
Семинарда қызмет көрсету персоналын кәсіби даярлау, қиын жағдайдағы туристермен жұмыс жүргізу, маршруттар құру, клиентпен жұмыс істеудің заманауи әдістері оқытылды. Сонымен қатар, турөнімді тиімді сату, кері байланыс пен клиент сенімін арттыру тақырыптары да қамтылды.
Шымкентте туризм саласын дамыту бағытындағы нақты істер жалғасып келеді. Осындай халықаралық деңгейдегі оқыту семинарлары қаланың туристік әлеуетін арттыруға және қызмет көрсету сапасын жақсартуға зор ықпал етуде.
