ӘЛЕУМЕТТІК МЕД САҚТАНДЫРУ ҚОРЫНДАҒЫ ӨЗГЕРІСТЕР

Мегаполисте міндетті әлеуметтік медициналық сақтандыру жүйесіне енгізілген өзгерістер таныстырылды. Сала мамандары жүйенің тиімділігі, сақтандыру мәртебесін анықтау тәртібі және тұрғындардың қамтылу деңгейі жөнінде мәлімет берді. Қазір қалада 1 миллионнан астам адам медициналық сақтандырылған. Бұл — мегаполис халқының 80 пайызынан астамын қамтиды.

Қазіргі таңда мегаполисте 700 мыңнан астам адам жеңілдік санатына жатқызылған. Олардың сақтандыру жарнасын мемлекет өз мойнына алған. Алайда қалада 237 мыңнан астам адамның медициналық сақтандыру мәртебесі жоқ. Оның ішінде 56 мыңнан астамы – әлеуметтік осал топ өкілдері. МӘМС туралы заңға енгізілген жаңа өзгерістерге сәйкес, 2025 жылдан бастап жергілікті атқарушы органдар әл-ауқаты төмен, яғни дағдарыстық және шұғыл жағдайдағы азаматтар үшін жарна төлеуді өз мойнына алады. Бұл – медициналық көмектің қолжетімділігін арттыруға бағытталған маңызды қадам.

Тағы бір өзгеріс — енді 5 жыл бойы тұрақты жарна төлеген азаматтар жұмыссыз қалған жағдайда сақтандыру мәртебесін 6 ай бойы сақтай алады. Бұрын бұл мерзім небәрі 3 ай болатын. Бірақ бұл кезеңде де азаматтар жарна төлемеген болса, кейін қарызын өтеуі қажет. Сонымен қатар, ресми жұмыссыз ретінде тіркелген азаматтар үшін жарна жергілікті бюджет есебінен төленеді. Бұл – әкімдіктерге жұмыспен қамту және кедейлікті азайту бағытында қосымша жауапкершілік жүктейді.

Биыл міндетті әлеуметтік медициналық сақтандыру жүйесі аясында жоғары технологиялы көмекке ерекше көңіл бөлініп отыр. Жыл басынан бері жалпы құны 1,8 миллиард теңгеден асатын 500-ге жуық жоғары технологиялы операция жасалған. Кардиохирургия мен нейрохирургия салаларындағы бұл күрделі оталардың құны бірнеше миллионнан бастап, 70 миллион теңгеге дейін жетеді. Жыл басынан бері қала тұрғындарына 3,5 миллионнан астам консультациялық-диагностикалық қызмет көрсетілген. Қаржыландырудың негізгі бөлігі – мамандандырылған стационарлық көмек пен жоғары технологиялы операцияларға бағытталған. 2024 жылы 137 мыңнан астам науқас стационарлық ем қабылдаса, оның 120 мыңнан астамы — МӘМС аясында, қалғаны — кепілдендірілген тегін медициналық көмектің шеңберінде емделген.