УНИВЕРСИАДАНЫҢ ҚОС ЧЕМПИОНЫ

Шымкент халықаралық әуежайында кезекті мәрте жеңіс әні әуеледі. Универсиада чемпионатында ел абыройын асқақтатқан спортшыларды қарсы алу рәсімі өтіп, әуежай алаңы қошемет пен қуанышқа бөленді.Германияның Рейн-Рур қаласында өткен дүниежүзілік жазғы Универсиадада Самирхон Абабакиров пен Нодира Ахмедова жоғары деңгейде өнер көрсетіп, ел қоржынына жүлде салды.

Спортшылар мінген ұшақ Шымкент әуежайына қонған сәтте оларды қарсы алуға қала спорт басқармасының өкілдері мен Қуатбеков атындағы Халықтар Достығы университетінің проректоры арнайы келді. Ресми тұлғалар чемпиондарды құттықтап, алдағы додаларда сәттілік тіледі.

     Таеквондодан Қазақстан чемпионатының жеңімпаздары, шымкенттік спортшылар Самирхон Абабакиров пен Нодира Ахмедова тағы бір ірі жарыста ел намысын абыроймен қорғап қайтты. 63 келі салмақта сынға түскен Самирхон қарсыластарына есесін жібермей, алтын жүлдені қанжығасына байлады. Ал 49 келі салмақта өнер көрсеткен Нодира жанкешті күрестің нәтижесінде қола медальға қол жеткізді. Чемпиондар жарыстан алған әсерлерімен бөлісіп, болашақ жоспарларымен таныстырды. Сондай-ақ, олар өздеріне қолдау білдірген жаттықтырушыларына, жанкүйерлерге және барлық жанашыр жандарға алғысын жеткізді.

Бұл жеңіс – жаттықтырушылар мен спортшылардың ұзақ уақыт бойғы еңбегінің жемісі. Шымкенттік қос таеквондошының табысы ел спортының халықаралық аренадағы беделін тағы бір биікке көтерді. Әуежайдан шыққан сәтте спортшыларды ата-аналары мен бауырлары да құшақ жая қарсы алды. Жақындарының қуанышы мен мақтанышқа толы жүзі бұл жеңістің қаншалықты маңызды екенін аңғартты. Ата-аналары перзенттерінің бұл жетістігіне дәл риза , сондай-ақ олардың еңбегі мен табандылығына шексіз риза екендерін жеткізді. Германияда өткен XXXII Дүниежүзілік жазғы Универсиадада Қазақстан құрамасына алғашқы алтын медальді шымкенттік таеквондошы сыйлады.Бұл жеңіс — ел намысын қорғаған жас спортшының жанкешті еңбегінің жемісі. Биыл ел қоржынында 7 медаль бар: оның алтауы қола және ең құндысы — алтын.