ТӘРБИЕГЕ ЖОЛ БАСТАҒАН АНИМАЦИЯЛЫҚ ФИЛЬМ

     Қаламызда «Тоқты мен Серке» толық метражды анимациялық фильмінің тұсаукесері өтті. «Сақ» киностудиясы мен «Балапан» телеарнасы бірлесе дайындаған туынды «ұрлық түбі – қорлық» тақырыбын арқау еткен. Анимациялық фильм 3 шілдеден бастап еліміздің кинотеатрларынан көрсетіледі.

    Бұл – «Balapan» телеарнасының 15 жылдығына орай жарық көрген үшінші туынды. Бұған дейін «Шоқан. Қашқария сапары» мен «Желаяқ» фильмдері көрерменге ұсынылған.«Тоқты мен Серке» анимациялық жобасы жаз бойы еліміздің 28 қаласындағы 80-ге жуық кинотеатрда көрсетілмек.

      «Тоқты мен Серке» толықметражды анимациялық фильмі – балаларға «Ұрлық түбі – қорлық» деген нақылдың мәнін жеткізуді көздеген тәрбиелік туынды.Бұл анимациялық фильм ұлттық таным мен заманауи тақырыпты үйлестіре отырып, жас көрерменге арналған тартысты әрі күлкілі оқиғалармен өрілген.

      Ұзақтығы бір жарым сағатқа созылатын бұл туындыны әзірлеу үшін бір жылдай уақыт кеткен. Оқиға желісінде Тоқты мен Серке барымташылардың қолына түсіп, ұзақ сапар шеккен жануарлардың еркіндікке шығу жолындағы тартысты оқиғасын баяндайды. Анимациялық фильм балаларға еркіндік, достық пен әділдік құндылықтарын ұғындыруды мақсат етеді