ҚАПТАҒАН КЕНЕДЕН АБАЙ БОЛЫҢЫЗ!

   Шаһарда кене шаққан адамдар саны көбейген. Өткен жылдың тиісті кезеңімен салыстырғанда 30%-ға артқан. Сондай-ақ, екі азаматтан Конго-Қырым қызбасы анықталып отыр. Қазіргі таңда қауіпті жәндіктің таралу аймағы көп 11 елдімекен бақылауға алынған. Мамандар тұрғындарды жеке сақтық шараларын қатаң ұстануға шақырады. Көктем мен жаз кененің белсенді шағу маусымы. Жыл сайын бұл кезеңде дәрігерлерге жүгінетіндердің қатары артады. Биылғы көрсеткіш тіпті күшейген. Жыл басынан бері 541 адам кенеден зардап шеккен. Олардың басым бөлігі 14 жасқа дейінгі балалар.
Кенелер адам мен жануардан шығатын иісті 20 метрден сезіп, небәрі 5 минуттың ішінде жабыса алады. Ғалымдардың айтуынша, әлемде 200-ден астам кене түрі кездеседі. Ал Шымкент аумағында көбіне иксод кенесі таралған. Бұл түрі — қауіпті вирустарды тасымалдаушы. Қауіпті жәндік жиі кездесетін елдімекендердің тізіміне Алтынтөбе, Қайнарбұлақ, Игілік, Сәуле, Текесу, Тассай, Бадам-1, Қазығұрт, Ақтас-1, Ақжар және Айкөл кіреді. Бұл аумақтарда энзоотиялық іс-шаралар да қолға алынған. Яғни, жануарларды кенеге қарсы емдеу жұмыстары жүріп жатыр. Энзоотиялық іс-шараларға бюджеттен 67 миллион 886 мың теңге бөлінсе, санитариялық-қорғаныш аймағын құрудың екінші кезеңіне сегіз жарым миллионнан астам қаржы қаралған.
Кенеден келетін қауіп әлі де өзекті болып тұр. Мамандардың айтуынша, оның алдын алудың ең тиімді жолы — қорғану шараларын қатаң сақтау. Қауіпті жәндікпен күресте ең тиімді әдіс — қорғану ережесін ұстану және уақытында медициналық көмекке жүгіну.