Елімізде генетикалық сараптама жасайтын 5 қана орталық бар. Соның бірі Шымкентте. Орталыққа Полиция департаменті мен азаматтық соттардан сұраныс өте көп түседі. Ал, ондағы мәселе ғимараттың ескіруі мен мамандардың тапшылығы. Ондағы заманауи технологияның үлесі 20% құраса, 70% ескірген. Қылмысты ашуда елеулі маңызы бар сот сараптамалық орталығына бүгін сенаторлар барды.
Қылмысты ашуда басты құрал – дәлдік. Ал, ол – ғылымда. Осы ретте Шымкенттегі сот сараптамалық орталығы осы салада аймақтың жүгін жалғыз өзі арқалап отыр. Мекеменің жұмысымен танысуға келген Нұрлан Бекназаров пен Айгүл Қапбароваға мамандар жай-күйді баяндап берді.
Мамандардың айтуынша, қазіргі техникалық база қылмыстарды дәлелдеуге жеткіліксіз. Ескірген құрылғылармен қатар қазір маман жетіспеушілігі бар. Бүгінгі күні 20-ға жуық сарапшы орны бос тұр.
Мамандар барын салып ғылыми тұрғыда жұмыс істеуде. Алайда техникалық тапшылық – қылмыстың бетін ашуға кедергі. Жоғарғы палата Сенаттан келген депутаттар мәселемен таныс екенін жеткізді. Қала әкімімен жолыққан олар жергілікті биліктің орталыққа жаңа ғимарат салу жоспары барын айтып қуантты.
Шымкенттегі сот сараптамалық орталығы – оңтүстік өңір үшін маңызды мекеме. Өйткені, қылмысты ашудағы басты тетік – бұлтартпас дәлел екені анық. Ал, оны анықтап, дәлелдейтін орталықтың күйі жақсармай, бұл саладағы түйткілді мәселелердің түйіні шешілуі қиын.
