Кентау политехникалық колледжінің 4-курс студенті Улугбек Бахтияров жұмысшы мамандарын даярлауға арналған оқу стендін жасап шығарды.
ASAR-1 — инженерлік мамандықтарды біріктіретін білім беру стенді. Оның көмегімен 13 түрлі инженерлік және техникалық бағыттардың негіздерімен танысуға болады. Бұл стенд оқушыларға болашақ кәсібін таңдауға мүмкіндік береді. Мұнда сондай-ақ электроника, автоматтандыру, бағдарламалау және мехатроника бағыттары бойынша практикалық тапсырмаларды орындауға болады.
Стендте 22 түрлі датчик пен компонент қойылған. Олардың қатарында DHT11 температура мен ылғалдылық датчигі, дыбыс датчигі, газды анықтау сенсоры, RFID модулі, Bluetooth және Wi-Fi модульдері, ультрадыбыстық датчик, сервомоторлар, дисплей, жарықдиодтар, реле және басқа да элементтер бар.
«Мен оқушылардың мектеп қабырғасынан бастап мамандық таңдап, оған кәсіби тұрғыда дайындалуына көмектескім келеді», — дейді Улугбек.
