Суицид, нашақорлық және діни экстремизм қазіргі қоғам дерті. Аталған мәселелердің алдын алу үшін Сайрам ауданы прокуратурасының бастамасымен кәмелетке толмағандар арасында «Заң мен тәртіп» атты кең ауқымды профилактикалық іс-шара өтті. Бұл жиынның негізгі мақсаты — жастар арасында нашақорлықтың, діни экстремизмнің алдын алу және құқықтық сауаттылықты арттыру.
Аудан прокуратурасының бастамасымен өткен «Заң мен тәртіп» атты кең ауқымды профилактикалық іс-шараның негізгі бағыты — жастар арасында нашақорлықтың, діни экстремизмнің алдын алу және құқықтық сауаттылықты арттыру. Профилактикалық жиын Ақсу ауылындағы мәдениет үйінде басталды. Шараға аудан прокуратурасы, полиция бөлімінің өкілдері, мектеп директорлары, мұғалімдер мен оқушылар қатысты.
Мамандар жасөспірімдерге өз құқықтары мен міндеттері жайлы түсіндіру жұмыстарын жүргізді. Сонымен қатар, нақты мысалдар келтіріліп, заңсыз әрекеттердің салдары туралы кеңінен айтылды. Жиынға арнайы қатысқан Қабылбек Әліпбайұлы жастарға қоғамда болып жатқан келеңсіз құбылыстар жайында кеңінен түсіндіріп, олардың рухани әрі құқықтық тұрғыда сауатты болуына мән беру қажеттігін атап өтті.
Шара барысында қатысушыларға құқықтық жадынамалар, ақпараттық парақшалар таратылып, интерактивті талқылаулар ұйымдастырылды. Оқушылар мен ата-аналар мамандарға өз сұрақтарын қойып, тұшымды жауап алды.
Келесі жиын Қарабұлақ ауылында өтті. Мұнда да жиынға ауыл жастары мен тұрғындары белсенді түрде қатысты. Жиналғандарға есірткі заттарын қолданудың денсаулыққа зияны, заң алдындағы жауапкершілігі, сондай-ақ интернет арқылы таралатын діни теріс идеологиялар туралы егжей-тегжейлі мәлімет берілді.
«Заң мен тәртіп» атты бұл шара – жастар арасында құқықтық мәдениетті қалыптастырып, оларды салауатты өмір салтына баулуға бағытталған маңызды қадам. Мұндай іс-шаралар алдағы уақытта да тұрақты түрде ұйымдастырылып отырмақ.
