Биыл Шымкент қалалық саяси қуғын-сүргін құрбандары музейінің ашылғанына 23 жыл. Айта кетейік, бұл елімізде саяси бағытта ашылған алғашқы музейлердің бірі. Осыған орай, шаһарымызда «Алаш-орда тарихының ізімен» атты квест ойыны өтті. Саяси қуғын — сүргін құрбандары музейі 2001 жылы 2 қарашада ОҚО Тарихи — өлкетану музейінің филиалы болып ашылған. Музей Қазақстан Республикасында саяси бағыттағы қуғын — сүргін тақырыбына арналып алғаш ашылған музейлердің бірі. Мекеменің сыртқы сәулеті мен ішкі дизайнының құрылысы және тақырыптық жоспары ерекше жасалған. Бастапқыда музей қоры 2500 — ге жуық экспонатпен ашылған болса, қазіргі таңда музей қорында 16600 ге жуық экспонат жинақталды. Қызметкерлер Қорды толықтыру мақсатында аудандық, қалалық, облыстық және шетелдік архив, музейлермен байланысып, жұмыстар жүргізеді екен. Музей саяси қуғын-сүргін құрбандарының ұрпақтарымен тығыз байланыста. Сонымен қатар жоғары оқу орындарының ғалымдарымен, тарихшыларымен, Алаштанушыларымен бірлесіп ғылыми жұмыстар жүргізеді және студенттердің қатысуымен көптеген іс-шарлар өткізеді. Алаш қайраткерлері мен саяси қуғын-сүргін құрбандарының мерейтойларын атап өту мақсатында іс-шаралар, лекциялар, көрмелер, дөңгелек үстелдер тұрақты өткізіліп тұрады.
Музейдің ашылғанына 23 жыл толуына орай Шымкент қаласы мәдениет, тілдерді дамыту және архивтер басқармасы «Шымкент қалалық саяси қуғын-сүргін құрбандарының музейінде» «Алаш-орда тарихының ізімен» атты квест ойыны өтті. Сайысқа қала университеттерінің студенттерінен құралған 5 команда қатысты. Атап айтсақ: Тенгри, Бес Арыс, Kaz Saq, Болашақ, Алаш мұрагерлері командалары өзара бақ сынасып, жеңімпаз болуға таласты.
