Жақында ғана Черногорияда өткен бокстан жастар арасындағы әлем чемпионаты аяқталған болатын. Дүбірлі додада топ жарып, әлем чемпионы атанған Санжарәлі Бегалиев ата-анасымен қауышты. Мегаполис әуежайында спортшыны салтанатты күтіп алу рәсімі өтіп, жиылған қауым жас чемпионға құрмет көрсетті.
22 қазан мен 3 қараша аралығында Черногорияның Будва қаласында өткен бокстан жастар арасындағы әлем чемпионында топ жарып, ел қоржынына екінші алтынды алып келген Санжарәлі Бегалиев туған жеріне оралды. Шаһардағы халықаралық әуежайда спортшыны салтанатты күтіп алу рәсімі өтті. Оған ата-анасы, туған туыстары, достары, қалалық спорт басқармасы қызметкерлері, ҚР еңбек сіңірген спортшылары қатысты. Санжарәлі Бегалиев қолдау көрсеткен барша жерлестеріне алғысын айтып, алдағы жоспарларымен бөлісті. Былғары қолғап шебері байрақты бәсекеде 5 кездесу өткізіп, барлығында айқын басымдылықпен жеңіске жеткен болатын. Атап айтсақ, Румыния, Болгария, Куба, Польша, Өзбекстан спортшыларын жарыс жолынан шығарды. Дегенмен, арна тілшісіне ағынан жарылған Санжарәлінің әкесі әрбір кездесудің өзіндік қиындықтары болғанын айтады. Айта кетейік, жастар арасындағы әлем чемпионы атанған Санжарәлі енді ересектер арасында бақ сынауға ниетті.
