Түбі бір түркі жұртының журналистері Алматыда бас қосты. Түркі елдерінің медиа және туризм бірлігін бекемдеген IV халықаралық форум ақпарат саласындағы өзекті мәселелер — адалдық пен шынайылық, қауіпсіздік пен медиа сауаттылық тақырыбын қозғап, кәсіби мамандар тәжірибесімен бөлісті. Төртінші биліктің тек ақпарат таратып қана қоймай, қоғамдық сананы қалыптастырушы жойқын қару екенін айтқан сарапшылар әріптестерімізге салмақты әрі сыни көзқарастың болуы маңызды екенін айтты. Сондай-ақ, форумда түркі жұртына ортақ телеарна ашу жоспары қаралып жатқаны белгілі болды.
«Түркітілдес журналистер қоры» Қоғамдық қорының ұйымдастыруымен «TURKTIME: ТҮРКІ ЕЛДЕРІНІҢ МЕДИА ЖӘНЕ ТУРИЗМ БІРЛІГІ» тақырыбында халықаралық IV медиа форум өтті. Оңтүстік астанадағы еркін пікір алаңына Ұлыбритания, Германия, Түркия, Өзбекстан елінен туризм және медиа саласының мамандары арнайы келді. Форумға сонымен қатар, Қазақстанның әр аймағынан масс-медиа саласының өкілдері қатысып, халықаралық деңгейде пікір айтып жүрген кәсіби мамандардан сабақ алды. Шараны ұйымдастырушы «Түркітілдес журналистер қоры». Құрылғанына 10 жыл толған қоғамдық қордың президенті Нәзия Жоямергенқызы қазақ тілді журналистердің кәсіби білігін арттырып, әлемдік деңгейге шығару басты мақсатымыз дейді.
11-12 қарашаға жоспарланған форумда түркі елдеріндегі туризм және PR, геосаяси ахуал және нарық, ақпаратты тұтынудың болашағы: жасанды интеллект, жаңа форматтар, аймақтық БАҚ және бәсекелестік тақырыптары қозғалып, пленарлық отырыс өтті. «Түркі мәдениеті мен мұрасы» қорының президенті Ақтоты Райымқұлова ділі мен діні, мәдениеті мен ұстанымы ұқсас түркі елдерінің ақпарат айдынындағы жұмыстары да маңызды дейді.
«IV халықаралық түркітілдес журналистер медиа форумының» алғашқы пленарлық отырысы “Түркі елдеріндегі туризм және PR” тақырыбына арналды. Түркі елдеріндегі туризмнің даму үдерісі, түйіткілі мен мүмкіндіктері талқыланды. Отырыс барысында сөз алған “Халык сузи” газетінің жауапты хатшысы Нурлан Усмановтың “Өзбекстан туризмінің даму келешегі” туралы презентациясына қарап, еліміздің туризм саласында кенжелеп келе жатқанын аңғаруға болады. Спикердің сөзінше көрші елде туризм саласын дамытуға ерекше басымдық берілген. Тек насихаттап қана қоймай, бүгінде туристер үшін қабылданған заңдар мен олардың ыңғайлылығы үшін қабылданған шараларынан Қазақстан үлгі алуы тиіс сияқты. Ащы болса да шындық сол, кенжелеп дамып келе жатқан еліміздің туризм саласын дамытуда алысқа бармай-ақ, көрші елден үйренеріміз көп секілді.
Мамандардың пікірінше, ақпаратты таратуда адалдық пен шынайылықты ұстану, қауіпсіздікке баса назар аудару, және медиа сауаттылықты арттыру – заманауи қоғамның ақпараттық қауіпсіздігі мен тұрақтылығын қамтамасыз етуге ықпал ететін негізгі факторлар. Бұл ретте Түркия Республикасының Алматыдағы Бас консулы Эврен Мүдеррисоғлұ екі елдің медиа және туризм саласындағы бірлескен жұмыстары жайлы айтты. Сондай-ақ, Қазақстан мен Түркия алдағы уақытта түркі дүниесіне ортақ телевизия ашуды жоспарлап жатыр екен.
Цифрлық технологияның көз ілеспес қарқынмен дамып кеткені сонша, қазіргі уақытта ақпаратты тарату барысында бірқатар мәселелер бар. Объективтілік, жалған ақпарат, цензура, қаржылық тәуелділік. Сапаға емес, санға жарыса жазатын медиа құралдар бұл арқылы қоғамдық санаға теріс әсер етуі мүмкін. Сондықтан журналист шынайы әрі объективті пікірінен айнымайтын, кәсіби этика мен адалдықтан аттамайтын, новаторлық мүмкіндіктерді терең меңгерген маман болуы қажет. Осы мақсатта ұйымдастырылған форумның қорытындысы бойынша қатысушылар жасанды интеллектінің қол жеткізген мүмкіндіктері және журналистік этиканы сақтау жолындағы маңызды қадамдарды нақтылады.
