Қазақстан Республикасы Президенті Әкімшілігінің және Төлеби ауданы мәслихаты депутаттарының келісімдері бойынша, Түркістан облысы әкімінің өкімімен Түркістан облысы, Төлеби ауданының әкімі болып Еркеғали Амантайұлы Әлімқұлов тағайындалды. Түркістан облысының әкімі Дархан Сатыбалды жаңа әкімді аудан активіне таныстырды. Аудандық мәслихат депутаттары жаңа әкімнің кандатурасына қолдау білдірді.
Облыс әкімі жаңадан тағайындалған аудан әкіміне басты назар аударып, атқаруды қажет ететін бірқатар мәселелер міндеттеді. Президент Қасым-Жомарт Тоқаевтың айқындап берген бағытта халықпен тығыз байланыста жұмыс істеуді, ауданда жаңа өндіріс орындарын ашып, тұрғындарды жұмыспен қамтамасыз ету, инвестициялар мен озық технологиялар тартып, өндірілетін өнім көлемін арттыру бойынша жұмыстарды жүргізуді жүктеді. Ең алдымен, аудан тұрғындарына барынша қолайлы тұрмыстық жағдайлар жасап, ауыл, елді мекендері жайлы, қауіпсіз, таза әрі көрікті аумаққа айналдыруды тапсырды.
– Бүгін аудандық мәслихатының сессиясына Төлеби ауданы әкімі қызметіне жаңа кандидатура ұсынылып, депутаттар тарапынан қолдау тауып отыр. Біздің басым бағыттарымыз белгілі. Ол – өндіріс орындары мен зауыттар ашу, инвестиция тарту. Оған қоса Төлеби ауданында ауыл шаруашылығы мен туризмді дамыту керек. Мүмкіндік мол. Жұмысты ширату керек. Ұзақ жылдар бойы мемлекеттік және басшылық қызметтерде шыңдалған Еркеғали Амантайұлы бұл бағытта жүйелі іс атқарады деп сенемін. Ауданның даму жоспарын нақтылап, жалпы өнім көлемін, өзіндік кірістерді арттыру керек, – деді Дархан Сатыбалды.
Еркеғали Әлімқұлов 1981 жылы 6 маусымда Түркістан облысы Төлеби ауданында дүниеге келген. Білімі жоғары. Мамандықтары — кеден ісі, құқықтану, экономика. Еңбек жолы:
🔹Қазақстан Республикасы Табиғи монополияларды реттеу және бәсекелестікті қорғау агенттігінің жетекші маманы (2003-2005);
🔹Қазақстан Республикасы Индустрия және сауда министрлігі Бәсекелестікті қорғау комитетінің Отын-энергетика кешенін талдау және реттеу бөлімінің бас маманы (2005-2007);
🔹Қазақстан Республикасы Индустрия және сауда министрлігі Бәсекелестікті қорғау комитетінің Тауар нарықтарын талдау дирекциясының Отын-энергетика кешенін талдау және реттеу бөлімінің бастығы (01.2007-2008 ж.);
🔹Тауар нарықтары мен бірігулер мониторингі мен талдау департаментінің Басқа салалар мониторингі және талдау, Отын-энергетика кешенінің мониторингі және талдау басқармасының басшысы, Отын-энергетикалық кешеннің мониторингі және талдау дирекциясының басшысы; Тауар нарықтарының мониторингі және талдау департаменті, Қазақстан Республикасы Бәсекелестікті қорғау агенттігінің (Монополияға қарсы агенттік) Тауар нарықтарының мониторингі және талдау департаменті директорының орынбасары (04.2008-11.2010);
🔹Қазақстан Республикасы Бәсекелестікті қорғау агенттігінің (Монополияға қарсы агенттік) Қостанай және Солтүстік Қазақстан облыстары бойынша өңіраралық инспекциясының басшысы (11.2010-05.2011);
🔹Қазақстан Республикасы Бәсекелестікті қорғау агенттігі (Монополияға қарсы агенттік) төрағасының орынбасары (05.2011-07.2012);
🔹Қазақстан Республикасы Бәсекелестікті қорғау агенттігі (Монополияға қарсы агенттік) төрағасының кеңесшісі (08.2012-02.2013);
🔹Қазақстан Республикасы Резидент әкімшілігінің мемлекеттік инспекторы (02.2013-04.2016);
🔹Оңтүстік Қазақстан облысы әкімі аппаратының басшысы (04.2016-07.2018);
🔹Шымкент қаласы әкімі аппаратының басшысы (07.2018-04.2021);
🔹Қазақстан Республикасы Ұлттық экономика министрлігі Кәсіпкерлікті дамыту департаментінің директоры (04.2021-05.2021);
🔹«Астана» ӘКК» АҚ төрағасы (06.2022-01.2023);
🔹Түркістан облысы әкімі аппаратының басшысы (01.2023 ж. бастап бүгінгі күнге дейін).
✔️Еркеғали Әлімқұлов пен Төлеби ауданының осыған дейінгі әкімі Төлеген Телғараевтың 2016-2018 жылдары қызмет жолдары қиысқан. Төлеген Тұртайұлы сол жылдары Қазығұрт ауданын басқарса, Еркеғали Амантайұлы Оңтүстік Қазақстан облысы әкімі аппаратының басшысы лауазымын атқарған болатын.
🗣️Түркістан облысындағы экологиялық туризмі дамыған ауданды тізгіндеуді қолға алған Еркеғали Әлімқұловты жаңа қызметімен құттықтаймыз! Ауданның әлеуметтік-экономикалық ахуалын жақсартып, табанды еңбек ете беріңіз.
