КӘСІПКЕРЛЕРГЕ ҚОРДАН ҚОЛДАУ БАР

«Даму» қоры ағымдағы жылы 1115 кәсіпкерлік жобаға 56,8 млрд теңге қолдау көрсеткен. Бұл ел экономикасының тұрақты дамуы мен азаматтардың әл-ауқатын арттырудың маңызды бөлігі.
«Даму» қорының мамандары БАҚ өкілдеріне арнайы тур өткізіп, қаладағы бірнеше кәсіпорынның жұмысымен таныстырды. Алдымен «ТEMKA» брендін қалыптастырған Әйгерім Тілеубаева 2023 жылдан бері жеке кәсіп бастаған. Дайын өнім ассортименті қуырылған, тұздалған тұқымдар, жержаңғақ, пісте және аралас сынды 5 түрден тұрады. Жәнібек Ысқақовтың сөзіне сүйенсек бұл цехты ашу арқылы, сапалы өнім шығаруды мақсат еткен. Негізгі шикізат көзі Шығыс Қазақстан облысынан келеді дейді.
Аспаздық және кондитерлік өнімдер арқылы «Айжамал тәттілері» брендін қалыптастырған «Aizhamal Group» ЖШС 2018 жылдан бері Шымкент қаласын сапалы өніммен қамтамасыз етуде. Мұнда 100-ден астам тәтті бәліштер, 10-нан астам торттар, сондай-ақ, қатырылған дайын өнімдер шығарылады. Наубайхана қызметін кеңейту мақсатында «Даму» қорының қолдауымен цехқа заманауи жабдықтар қойылған.
Келесі аралаған нысан ағымдағы жылы тұсауы кесілген «Zangar Bilim» компаниясының «Аужан» КТЛ мектебі. Білім ошағы оқумен қамтамасыз етіп қана қоймай, баланың қоғамда тұлға болып қалыптасуына жұмыс жасайды. Заманауи жабдықпен қамтылған мектепте 5 тіл үйрену мүмкіндігі бар. Айта кетейік, мұнда спорт, сурет салу, бағдарлау және музыка сынды бағыттар бойынша 30 түрлі үйірме жұмыс жасайды. Сондай-ақ, мектепке Бекзат Саттархановтың тер төккен рингі арнайы қойылған.
Кәсіпке мемлекеттік қолдау көрсету өте маңызды. Осыған орай, «Даму» кәсіпкерлік дамыту қоры қаржылық мәселені шешіп, екінші деңгейлі банктерден несие алуға мүмкіндік береді. Даму қоры «Бәйтерек» Ұлттық холдингінің құрылымына кіретін мемлекеттік даму институты. Қордың негізгі мақсаты еліміздегі шағын және орта бизнесті дамыту.