Денсаулық сақтау министрлігінің хабарлауынша, елімізде күн сайын екі әйел жатыр мойны обырынан қайтыс болады. Аурудың алдын алу үшін Қазақстанда 11 жасқа толған қыздарға адам папилломасы вирусына қарсы вакцина салу басталды. Ал шаһарымызда 13 000 жуық қыз балаға екпе жасау жоспарланып отыр. Жыл сайын әлемде жатыр мойны обырының 600 000-нан астам жаңа жағдайы тіркеледі. Ал Қазақстанда күн сайын 5 адам осы ауруға шалдыққаны анықталады. Елімізде әйелдер арасында жатыр мойын обыры сүт безі обырынан кейін екінші орында тұр. Бүгінгі таңда бұл аурудың бастапқы профилактикасы вакцинация, екіншісі — скрининг болып табылады. Әлемде адам папиллома вирусының 200-ге тарта түрі бар, ал Қазақстан таңдаған вакцина тек 4 түріне қарсы қуатқа ие екен. Жалпы елімізге 350 мың доза вакцина жеткізілген, ол 175 мың адамға салуға арналған. Себебі вакцина екі дозадан тұрады, араға алты ай салып екінші дозасы салынады. Адам папиллома вирусы Ұлттық егу күнтізбесіне енгізілген, екпе ата-ананың баланы вакцинациялауға келісімін алғаннан кейін жүргізіледі. 11-13 жас шамасы онкологтардың ұсыныстары бойынша алынған, өйткені бұл жастағы иммундау ересектерге қарағанда тиімдірек және тұрақты иммунитет қалыптасады. Екпе жұмыстары мектептердің медициналық кабинеттерінде жүргізіледі және тұрғылықты жері бойынша емханалардан да алуға болады. Үшінші мегаполисте екі мәрте егуге 26 000 доза вакцина бөлінеді деп жоспарланған. Бүгінгі таңда 11 900 доза вакцина келіп, емханаларға таратылды. Олар суық тізбекті сақтай отырып, тиісті жағдайларда сақталуда. Вакцина вирустың барлық түрінен қорғамайды, тек онкологияны тудыратын 4 түрінен қорғауға бағытталған. Әлемде тоғыз валентті де вакцина бар, алайда министрлік оны алу үшін ұзақ жыл қажет екенін айтады. Сол себепті қолжетімді төрт валентті вакцинаны таңдаған. Вакцина салғаннан кейін бұлшық ет ауырсынуы, ісуі, қызаруы және дене қызуы көтерілуі мүмкін. «Ауыр реакция ішінде анафилактикалық шок болуы мүмкін. Алайда Дүниежүзілік денсаулық сақтау ұйымының мәлімдеуінше, осы уақытқа дейін 270 млн доза вакцина салынған, ауыр түрдегі реакция тіркелмеген», — дейді мамандар. Бүгінгі таңда бұл вакцина әлемнің 135 елінде қолданылады, соның арқасында бірқатар елде әйелдер арасында адам папиллома вирусы таралуы бүгінгі күні 90%-ға төмендеді. Айта кетейік, бұл вакцинаны 11-13 жастағы қыздарға тек ата-анасының рұқсат негізінде ғана салуға болады. Сондай-ақ, вакцина салмастан бұрын қыздардың бұл инфекцияны жұқтырған-жұқтырмағаны тексеріледі.
