Шымкентте жыл басынан бері экология департаменті жоспардан тыс тексерулер жүргізген. Жалпы 55 әкімшілік іс қозғалып, 4 кәсіпорынның жұмысы сот шешімімен тоқтатылды. Тексеру нәтижесінде анықталған заңбұзушылықтарды жою үшін түрлі шаралар қолданылып жатыр. Қоршаған ортаға ең көп әсер ететін ірі кәсіпорындардың қызметі туралы ақпараттандыру мақсатында, баспасөз брифингі өтті. Жиында ағымдағы жылы экология департаменті жүргізген тексерулердің саны, жол картасы аясында іске асырылған іс-шаралар, ірі кәсіпорындардың қызметі жөнінде баяндалды. Осы жылы I санаттағы кәсіпорындармен табиғатты қорғау іс-шараларына бөлінген қаражаттың 63% игерілді. Департамент тарапынан жыл басынан бері жалпы 52 мемлекеттік қызмет көрсетілген. Сондай-ақ, шаһарымызда ауа, су, топырақ объектілері бойынша сынама алынып, талдау жұмыстары жүргізілді. Стихиялық қоқыстарды жою бойынша рейдтер жүйелі түрде жүргізіліп жатыр. Экология департаменті қала прокуратаурасымен және жергілікті атқарушы органмен бірлесіп, стихиялық қалдықтарды рұқсатсыз орналастыруды жою бойынша шаралар қабылдады, нәтижесінде 17 стихиялық орын істен шықты. Ағымдағы жылдың маусым айының деректері бойынша 8 рұқсат етілмеген қоқыс тастайтын нүкте анықталып, олар түбегейлі жойылды. Еске салайық, мемлекет Басшысының тапсырмасына сәйкес ағымдағы жылдың сәуір – қыркүйек аралығында Шымкент қаласында «Таза Қазақстан» экологиялық акциясы өткіп жатыр. Акция басталғалы 18 мың тоннадан астам тұрмыстық қалдық шығарылды.Қала тұрғындары, ардагерлер мен қоғам белсенділері және ерікті жастар белсене атсалысуда. «Таза Қазақстан» акциясын қарқынды жалғастыру мақсатында жыл соңына дейін қала тұрғындарының экологиялық мәдениетін қалыптастыратын қалалық іс-шаралар одан әрі жүзеге асырылатын болады.
