ӘЙЕЛДЕР КӨШБАСШЫЛЫҒЫ

Шымкентте билікке белсенді араласуға ынталы әйелдерге арналған үш күндік тренинг басталды. Онда сайлауға қатысқан немесе сайлау науқандарына қатысуды жоспарлап жүрген әйел азаматтар, үкіметтік емес ұйымдардың басшылары, азаматтық қоғам белсенділері дәріс ала алады. Қатысушылар өздерінің біліктілігін арттыруға және белсенді саяси қызметке дайындалуға бірегей мүмкіндік алады.

Елімізде тұрмыстық зорлық-зомбылықтан зардап шеккендерді қолдау мақсатында түрлі іс-шаралар мен жиындар өткізіліп келеді. Гендерлік теңдікті іске асыру мақсатында ҚР Мәдениет және ақпарат министрлігінің және ҚР Президенті жанындағы Әйелдер істері және отбасылық-демографиялық саясат жөніндегі комиссияның қолдауымен, Қазақстандағы «БҰҰ-әйелдер» құрылымының ұйымдастыруымен еліміздің барлық өңірлерінде үш күндік оқыту жұмыстары жүргізілді. Тренинг әйелдердің саяси белсенділігі мен көшбасшылық қасиеттерін арттыруға бағытталған. Оған Алматы, Тараз, Түркістан, Шымкент сонымен қатар Семейден арнайы өкілдер келді.

Бағдарламаға интерактивті сабақтар, шеберлік сыныптары және практикалық семинарлар кіреді. Қатысушылар өздерінің біліктілігін арттыруға және белсенді саяси қызметке атсалысуға мүмкіндік алады. Бұл үрдіс әйелдердің билік органдарындағы өкілдігін нығайтуға және аймақ пен елдің дамуына белсенді араласуына ықпал етеді.

Айта кетейік, 1998 жылдан бастап Қазақстан әйелдерге қатысты кемсітушіліктің барлық нысандарын жою туралы конвенцияға қосылды. Қазақстан 2023 жылы оны орындау бойынша кезекті мерзімді баяндама ұсынды.