ВИЦЕ-МИНИСТРДІҢ УӘДЕСІ…

80 мыңнан астам адам табиғи газға қол жеткізіп, газдандыру деңгейі 100% құрайды. Бұл туралы Шымкент қаласына жұмыс сапарымен келген энергетика вице-министрі халықпен есептік кездесуде айтты. Жиын барысында электр энергетикасы, жанар-жағармай, сұйытылған мұнай газы бойынша атқарылған жұмыстарды баяндады.
Арнайы жұмыс сапарымен келген Ерлан Құдайбергенұлы алдымен электр энергетикасы мәселесіне тоқталды. 2025 – 2026 жылдарға арналған бюджеттік бағдарлама шеңберінде «Шымкент қаласының Ынтымақ шағынауданында кіші станция және электр желілерін салу» жаңа жобасын іске асыруға 5 млрд теңге бөліну жоспарлануда екенін айта отырып, жобаны іске асыру кезінде Ынтымақ, Батыс, Солтүстік саяжай, Жаңатұрлан, Темірші әулие шағынаудандарының 45 мыңға жуық тұрғыны және Шымкент қаласының солтүстік-батыс бөлігіндегі әуежайдың жаңа терминалы үздіксіз электрмен жабдықталады деді.
2023 жылы Шымкент Мұнай Өңдеу Зауытын 12 млн тоннаға дейін кеңейтудің базалық жобасы басталған. Кеңейту шеңберінде 12 млн тоннаға дейін мұнай өңдеу жоспарланып, пайдалануға беру кезеңінде шамамен 4000 уақытша жұмыс орны мен 1200 тұрақты жұмыс орнын құру көзделген. Пайдалануға беру 2030 жылға жоспарланып отыр. Сондай ақ, үшінші мегаполисте сұйытылған мұнай газының шекті бөлшек бағасы 1 литр үшін 70 теңгені құраған. Қалада 4 газ толтыру және 192 автомобильге газ құю станциясы бар.
Жиын барысында вице-министр бірнеше газ өңдеу зауытының жоспарлануда екенін айтты. Атап айтар болсақ, Жаңаөзен, Атырау және Қарашығанақ кен орындарында жаңа зауыттарды іске қосу 2029 жылға жоспарланған.