ҚАЛА ӘКІМІНІҢ КӨШПЕЛІ КЕЗДЕСУІ БАСТАЛДЫ

Ғабит Сыздықбеков халықпен кездесуін бастады. Ашық аспан астындағы көшпелі кездесудің алғашқысы Қаратау ауданының халқымен өтті. Еркін форматта өткізіліп жатқан жиында тұрғындар көкейінде жүрген арыз-шағымдарын айтты. Халықпен ашық сұхбаттасқан әкім жауапты басшыларға аталған мәселелерді шешу жолын қарастыруды тапсырды.
Қаратау ауданы тұрғындарымен кездесу өткізген қала әкіміне Тассай шағын ауданы, Жібек жолы көшесінің тұрғындары газ мәселесін айтып шағымданды. «Шымкентте туып өссем де, Шымкенттік варианттан алыспын»,- деген басшы, «айтсам істеймін» деді. Сондай-ақ, кездесуде транспорт, балалар ойын алаңшасы және де Таскент елді мекеніндегі асфальт, мектеп құрылысы сынды мәселелер көтерілді.
Кездесудің жалғасы Сайрам тұрғын алабында өтті. Халық 1996 жылдан бері қоныстанған ауылға мүлдем жол төселмеген, «көшеміз тас оны да өзіміз төсеттік»,- дейді жергілікті тұрғындар. 35 жылдан бері әлеуметтің әлеуетін тіктейтін ешқандай жұмыс жүрмеді деген халық, Ғабит Сыздықбековке сенім артып отыр.
Жүзбе-жүз кездесіп, еркін сұхбат құрып жүрген әкімнің бұл кездесуінде халықтың ойы қақ бөлінді. Бірі қолдаса, басқасы кездесу белгілі бір мекемеде өткізілуі керек деседі.
Кездесу тұрғындардың мәселелерін толық көруге мүмкіндік береді деген Әйгерім Жұмағұлова бұл формат алғаш рет емес дейді. Сондай-ақ, әкім халықтың жағдайын жасау үшін кез келген жағдайда жауап беруге тырысады деседі. Жиын соңы қазыналы қариялардың батасымен аяқталды.