Жастардың тұлға ретінде қалыптасып, қоғамнан өз орнын табуына көмектесетін басқарманың жұмысы жайлы қаншалықты білесіз? Иә, мегаполистің ішкі саясатын жүргізетін жауапты басқарма келешектің тұтқасы болар жасөспірімдердің жан-жақты дамуына жол ашады. Тек, таланттарды танытып қана қоймай, мәселеге тап болған жастарды белсенді өмірге бейімдейміз дейді жауапты басшылар.
12 тамыз — Халықаралық жастар күні. Қала халқының 31,4% алатын жастар үшін атаулы күн 10 күн бойы аталып өтеді. Оның алғашқы бағдарламасын демалыс күндері бастап та кеттік. Концерттік кеш, тазалық акциясынан бөлек бұл күндері жастардың білімі мен қарым-қабілетін, шығармашылығын шыңдайтын қандай жұмыстар жүргізіледі? Ішкі саясат және жастар істері жөніндегі басқармасы басшысының міндетін атқарушы Жұмағұлова Әйгерім баяндады.
Ұлттық онкүндік бағдарламаға қазынадан қаржы қаралмаған. Жергілікті мемлекеттік мекемелермен бірлесіп іске асырылатын шараның негізгі мақсаты — жастармен байланысты нығайту. Осы ретте басқарма басшысының міндетін атқарушы қазірде жастарға жасалып жатқан мүмкіндіктің мол екенін айтады. Шаһардың 5 ауданында орналасқан ЖРО — ізбасар буынның басын қосып, оларды жұмыспен қамтуға, заңдық, прсихологиялық тұрғыда жәрдем беруге, жас кәсіпкерлерді қолдауға арналған орын.
Ал, жастар ресурстық орталығына келген жаңа басшы Марат Бақытжанұлы жұмысымның бастамасын әлеуметтік белсенділігі төмен жастардан бастаймын дейді.
Атаулы дата күнтізбеге 1999 жылдан бастап енді. Сол жылы БҰҰ Бас Ассамблеясы Жастар ісі жөніндегі дүниежүзілік министрлер конференциясы 12 тамызды Халықаралық жастар күні етіп жариялау туралы ұсынысын қолдады. Жастарға көңіл көтеретін кеш сыйлап қана қоймай, интеллектуалды ой-өрісін дамытатын жұмыстарды жүзеге асырамыз деген басқарманың алдағы күннің еншісінде тұрған жобасы көңіл қуантты. Буыны бекіп, қанаты қатаймаған жастарға бағыт-бағдар беруші жауапты мекеменің ісіне уақыт төрелік етсе, халық таразылайды.
