ӨЗЕН ЖАҒАЛАУЫ ҚОҚЫСТАН ТАЗАРТЫЛДЫ

Қоршаған ортаны қорғауда табиғаттың барлық жаратылысын қамқорлыққа алып, зиян шекпеуін қадағалау өте маңызды. Осы орайда, елу жылдан астам тарихы бар “Бадам” өзенінің жағалауы қоқыстан тазартылды. “Таза Қазақстан” республикалық экологиялық акциясы аясында өткен сенбілікке еріктілер, қоғам белсенділері білек түре атсалысты.

Бадам – Қаланың солтүстік-батыс аумағын қамтитын қала тұрғындарының бір сәт демалуына және қала маңындағы елді мекендерде егін және бау-бақшаларды сумен қамтамасыз ететін бірден-бір өзен. Сондықтан да өзеннің жағалауын тазалықта ұстау басты міндет. Осы орайда, “Таза Қазақстан” акциясы аясында өткізілген сенбілікте 40-қа жуық белсенді жастар мен волонтёрлар Бадам өзенінің бойын күл-қоқыстан тазартып, демалушылар аймағын ретке келтірді.

«Таза Қазақстан» республикалық акциясы еліміздің барлық аймағында жалғасын тауып, жалпыхалықтық эко-челленджге айналды. Бүгінде бұл шараға ерікті жастар мен белсенді студенттер ғана емес түрлі мекеме қызметкерлері атсалысуда. Басты мақсат – қоршаған ортаны сақтап, экологиялық мәдениетті қалыптастыру. Ал, Бадам өзенінің бойын тазалауға өз үлесін қосқан ерікті Тоқтасын Қамбар қаламыздың тазалығы басты назарда екенін, оған әрбір қала тұрғындары белсене атсалысуы қажет екенін жеткізді.

Мемлекет басшысының тапсырмасымен жүзеге асып жатқан акцияға жастар осылайша тек елді мекендерді емес, табиғат аясының да тазалығын сақтауға үлесін қосып келеді. ‎