ТҰРҒЫНДАР ТЕГІН ҚҰҚЫҚТЫҚ КЕҢЕС АЛДЫ

Арбат алаңында «Халық заңгері» акциясы өтті. Науқан аясында қала тұрғындарына жоғары білікті заңгерлер, тәжірибелі адвокаттар және мемлекеттік орган өкілдері тегін көмек көрсетті. Шара барысында тұрғындар тарапынан кәсіпкерлік саласында субсидия алу мәселесі, сот актілерінің орындалуы және жер мәселесі бойынша сауалдар қойылды. Толығырақ, тілшіміз Аружан Маттай тарқатсын.

“Халық заңгері” акциясын инстаграм желісі арқылы біліп келген Қайырхан есімді қала тұрғыны Шымкент қаласының жер ресурстарын басқару департаментіне өзінің көптен бері шеше алмай жүрген мәселесінің шешімін тауым, оңтайлы жауап алдым, дейді. Азамат Тұран ауданында 4-ші жолда 2006 жылы 10 соттық жерді 6000 долларға сатып алған. Дегенмен, үйінің шегі қызыл сызықтан өткен деп, мемлекет 2012 жылы мәжбүрлі түрде алады. Жол салынады деп, мемлекет мұқтажы үшін алынған жер учаскілерін қайта сала басшылары 2023 жылы 4 қыркүйекте меншік иелеріне қайтарады. Алайда Қайырхан Жүнісов өзінің үйі әлі де қызыл сызықта тұрғанын айтады.

Акция асында осылай қала тұрғындары заң өкілдеріне жүгініп, тұшымды жауап алу мүмкіндігіне ие болды. Бір мезетте еліміздің құқық қорғау саласының қызметкерлері бас қосып тұрғындардың шағым арыздарын тыңдап, оларға бағыт-бағдар берді.

Акцияның мақсаты— халықтың құқықтық сауаттылығын арттыру және тегін заң көмегін көрсету. Кез келген азамат еліміздің заң қоғамдастығындағы ең үздік өкілдерден тегін қажетті консультация ала алады. Олардың арасында белгілі адвокаттар, нотариустар, прокурорлар, тергеушілер, сот орындаушылары, мемлекеттік органдардың өкілдері және басқарма басшылары бар. Айта кетейік, бұл акциядан бөлек Шымкент қалалық адвокаттар алқасында қала тұрғындары аптаның әр сәрсенбісінде адвокаттардан заңгерлік тегін кеңес ала алады.