Туризм және спорт вице-министрі Мирас Төлебаев Ақтау қаласының тұрғындарымен есеп беру кездесуін өткізді. Жиынға турбизнес, спорт өкілдері қатысты.
Өңір тұрғындарымен кездесуде вице-министр министрліктің қазіргі қызметі, туризм және спорт, ойын бизнесі мен лотерея салаларындағы реформалар туралы баяндады. Мирас Төлебаев Маңғыстау облысының табиғаты ерекше, тарихи және мәдени ескерткіштерге бай екенін атап өтті. Бүгінде Каспий теңізінің жағалауындағы курорттық аймақ еліміздің ең тартымды бағыттарының бірі.
«Маңғыстау облысына келетін саяхатшылардың саны жыл өткен өсіп келеді. Мәселен, 2023 жылы аймаққа 390 мыңнан астам турист келген. Бұл 2022 жылғы көрсеткішпен салыстырғанда 80 мың адамға көп. Бұл дерек, Маңғыстау облысының туристік бағыт ретінде өсіп келе жатқанын көрсетеді. 2023 жылы аймаққа 350 мыңнан астам резиденттер келген, 2022 жылмен салыстырғанда 30%-ға көп. Бұл өсім ішкі туристер арасында аймаққа деген қызығушылықтың артқанын көрсетеді», — деді Мирас Төлебаев.
Кездесу барысында Мирас Төлебаев өңірге инвесторларды тарту кезінде туризм объектілеріне инженерлік-коммуникациялық және көліктік инфрақұрылымды қамтамасыз ету қажеттігін ерекше атап өтті.
Сондай-ақ Туризм және спорт вице-министрі жуырда ғана Мемлекет басшысы қол қойған Ойын бизнесі және лотерея мәселелері бойынша Заңға тоқталды.
«Қабылданған құжат 8 кодекс пен 14 Заңның нормаларын қозғайтын тарихта бұрын-сонды болмаған 150 түзетулерді қамтиды. Заң халықтың сауаттылығын арттыру, жарнаманы шектеу, сапалы медициналық көмек көрсету, мемлекеттік бақылауды күшейту арқылы лудомания проблемасын шешуге бағытталған. Онда Президенттің Қауіпсіздік Кеңесінде және Ұлттық құрылтайда берген тапсырмалары түгелдей ескерілген», — деді Мирас Төлебаев.
Қазақстан Республикасы Туризм және спорт министрлігінің баспасөз қызметі.
