ІТ САЛАСЫН ДАМЫТУ ЖОЛДАРЫ ҚАРАЛДЫ

Түркістан облысы әкімінің апталық мәжілісінде өңірді сапалы ғаламтормен қамту мәселесі талқыланды. Облыс әкімі жауапты басшыларға ІТ саласын дамыту жолдары бойынша интернет байланысын күшейту, ауылдарда байланыс сапасын жақсарту жұмыстарын тапсырды.
– Цифрландыру – заманауи әрі жастарды қызықтыратын сала. Жаңа идеялар ойлаңыздар. Түркістанды ІТ саласы дамыған орталыққа айналдыруымыз керек. Жуырда Татарстанға барып, сол жақтағы ІТ саласындағы жұмыстармен таныстым. Онда арнайы мектептер ашылған. Түлектерінің 100 пайызы жұмыспен қамтылып жатыр екен,- деген Дархан Амангелдіұлы байланыс операторларының жауапкершілігін көтеру, солармен бірлесе жұмыс істеу, инвестиция тарту мәселелерін реттеуді тапсырды.
Түркістан облысының цифрландыру, мемлекеттік қызметтер көрсету және архивтер басқармасы басшысының айтуынша, Түркістан облысы аумағында жалпы 2 053 379 тұрғыны бар елді мекендердің 386-сы 3G және 304 ауыл 4G мобильді интернетпен қамтылған. Облыс мобильдік интернет желісімен қамтылу деңгейі халық санына шаққанда 92,2% және ауылдық елді мекен санымен есептегенде 83% құрайды. 139 АЙМАҚТЫҚ ЕЛДІ МЕКЕННІҢ 100-і 2G мобильді байланыс желісімен қамтылған. Жол картасы аясында халық саны 250-ден жоғары 81 елді мекеннің 50-ін 2024-2025 жылдары интернет желісімен қамту жоспарлануда.
«Қолжетімді интернет» ұлттық жобасы аясында Түркістан облысының бекітілген ауылдық елді мекендерің мобильді интернет желісімен қамту жол картасы негізінде биыл байланыс операторлары (Кселл, Билайн) өз қаражаты есебінен 106 базалық станция орнатуды жоспарлап, қазіргі таңда жер телімдерін рәсімдеу жұмыстары жүргізіліп жатыр.