КӘСІПКЕРЛІКТІ ДАМЫТУ — ЕЛДІҢ ӨРКЕНДЕУІ

Аграрлы аудан саналатын Сауран жерінде шағын және орта кәсіпкерлік жыл санап өркен жайып келеді. Осы өрісті іспен таныспақ мақсатымен журналистер тобы арнайы баспасөз сапарымен Шаға, Оранғай, Шорнақ елді мекендерінде болып, кәсіптің көзін тапқан азаматтармен кездесті. Бүгінде ауданда жылына 12 000 дана жиһаз өнімдерін шығаратын, жыл 12 ай гүл өсіретін жылыжай жұмыс жасайды. Сонымен қатар, еліміздегі алғашқы роботтық технологиялар да осы жерде дамуда.
Төртінші билік өкілдерінің мерекесі қарсаңында Сауран әкімдігінің ұйымдастырумен ауданның жандану жұмыстары БАҚ өкілдеріне таныстырылды. Өндірісі өрлеп тұрған мекеннің даму қарқыны жоғары. Ауданда еліміздегі тұңғыш су үнемдеу құрылғыларын шығаратын «BNK CROUP LTD» ЖШС жұмыс жасайды. Негізгі мақсат – жаңа технологияның көмегімен су үнемдей отырып, өнім көлемін арттыру. Биыл өңірде 22 мың гектарға су үнемдеу технологиясын қосымша ендіру жоспарланған. Айта кетейік, бұл мекеме 2023 жылдан бастап жұмыс істеп келеді. Қазірде мұнда 80 адам тұрақты жұмыспен қамтылып отыр. Онда бір цех ішінде жаңбырлатып суару машиналары жасалып, тракторлар құрастырылуда. Жобаның қуаттылығы – жылына 950 жаңбырлатып суару жүйесін шығарады. Бұл техника америкалық технология негізінде жүзеге асырылады. Сонымен қатар жобаның жүзеге асырылуы бірнеше кезеңдерден тұрады, жалпы құны 11,5 млрд. теңгені құрайды. Аталған компанияға Сауран ауданындағы өндірістік парктен арнайы жер, браунфилд берілген. Мұнда шығарылған өнімдерге өзге өңірлермен қатар, шетелден де сұраныс жоғары. Кейіннен Қазақстан нарығында 2016 жылдан бері жұмыс істеп келе жатқан «Ақниет holding» жиһаз шығаратын кәсіпорыны таныстырылды. Компания жылына 34 мың жиһаз және 24 мың мектеп партасын жасап шығарады. Нақтырақ айтсақ, зауыт 1 күнде 1200 дана комфорттық мектепке арналған парталар мен орындықтар шығаруда. Бүгінде холдинг еліміздегі алғашқы роботтық технологияларды дамыту аясында жұмыс істеуде, негізгі мақсат өнімнің сапасын арттыру, айта кетейік зауытта роботтар өз жұмысын бастаған. Әрбір шығарылып жатқан өнім роботтарға компьютер арқылы тапсырма беріліп жасалады. Сол себепті өнімдерге 3 жылдық кепілдік беріледі. Компания тек мектеп жиһаздарын ғана емес, сонымен қатар мемлекеттік мекемелерге таза қарағайдан жасалған ағаш үстелдер мен орындықтар, медициналық мекемелерге жатын орындар, реанимациялық палаталарға арналған құрал жабдықтар өндіреді. Мұнда 97 адам жұмыспен қамтылған. Бұл жоба ішкі нарықтың сұранысын қанағаттандырып қана қоймай, Қазақстанның экспорттық әлеуетін кеңейтуге әсер етіп, еліміздің азаматтары үшін еуро стандартқа сай ұзақ уақыт қызмет жасайтын өнімдер шығаруда.
Дильназ Омарова Қарашық ауылдық округіндегі «Дильназ» гүл өсіретін жеке кәсіп иесі. Жылыжайда жыл бойы қысы-жазы үй және дала гүлдерін өсірумен айналысады. Мұнда роза, хризантема, лотос, гүлдерімен қатар, декоративті ағаштар да өсіріледі.

-Сирек кездесетін гүлдердің көшеттерін Қытай, Голландия елдерінен тапсырыспен алдырамын, мұнда құны 110 мың теңгелік өсімдіктеріміз де бар,– дейді Дильноза Омарова. Кәсіпкер гүлді суаруда заманауи технологияларды қолданатынын, бөлме гүлдерін отырғызатын керамикалық құмыраларды өздері өндіретінін айтты. Жайқалған гүлдерге сұраныс көп. Алыс-жақын қалаларға жеткізу қызметі жолға қойылған. Негізінен мұнда ауыл адамдары келісім-шарт бойынша жұмыс жасайды екен.
Сауран ауданы, Шорнақ ауылдық округінде «TAK Mebel» жиһаз кәсіпорны бар. Ауданда халық сұранысына қарай зауыттар мен фабрикалар ашу, жаңа жұмыс орындарын көбейтуге ден қойылған. Бұл бағытта ауданда бірқатар жобалар қолға алынып келеді. Әсіресе жиһаз шығару саласының даму қарқыны жоғары деуге болады. Жылына 12 000 дана өнім өндірілетін цехта 45 адам тұрақты жұмыспен қамтылған. Сапалы әрі бәсекелестікке төтеп беретін жиһаздарға сұраныс жоғары. Мұндағы өнімдер шетелдің жиһаздарынан кем емес. Өнімнің сапасы жоғары және қазіргі заманғы материалдарды пайдалану арқылы өндіруде. Сондай-ақ, жиһаз өнімдері сапа менеджменті сертификатпен расталған. Бұдан бөлек, өндіріс орны дизайнерлердің қатысуымен сенімді компоненттерді пайдалана отырып, тұтынушыға тек жоғары сапалы жиһаз ұсынуда. Аталмыш кәсіпорынның қызметкерлері шын мәнінде бірегей дизайнерлік жиһаздың керемет коллекцияларын жасап шығаруда. Қазіргі таңда «TAK Mebel» жиһаз кәсіпорны өнімдері еліміздің бірқатар аймақтарында жиһаз дүкендерінен сатып алуға болады. Шетелдік өніммен тең сапада шығаратын отандық өнімді қолдану арқылы жеке кәсіпкерлердің істерін дамытуға үлес қосумыз керек.
Ауданның әлеуетімен таныстырған Мақсат Таңғатаров биыл жылдық өнімді 132 млрд. теңгеге арттыруды жоспарлап отырмыз дейді. Қазірде Сауранда 30-дан астам жиһаз жасау цехтары бар. Жалпы 2024 жылға 12 цех ашу жоспарланып, қазір 9-ы іске қосылған. Бұдан бөлек әр ауданда кәсіпорын ашуға жер бөлінген. Нақтырақ айтсақ, Қарашық ауылдық округінен 10 гектар жер бөлініп, 21 цех ашу жоспарланып отыр дейді аудан әкімі.