АУДАННЫҢ ӘЛЕУЕТІ АРТУДА

Дархан Сатыбалды Түлкібас ауданы тұрғындарымен кездесті. Кездесуде ауданды дамыту, инфрақұрылымын жақсарту, атқарылған жұмыстар және алдағы жоспарлар талқыланды. Айта кетейік, облыс әкімі сапар барысында бірқатар кәсіпорындарды аралап, жергілікті халықтың әлеуметтік жағдайымен танысты.

Түлкібас ауданында мемлекеттік қолдаумен өндіріс саласы дамуда. Жергілікті кәсіпкерлер субсидия, жеңілдетілген несие алып бизнесін кеңейтіп жатыр. Пандемия кезінде тұралап қалған кәсіпорындар жұмыстарын жандандырды. Әкімдіктің қолдауымен түрік инвесторлары қаржы құйған «Azia Food Company» ЖШС биыл қайта іске қосылған. Ұн диірмен кешені жылына 36 мың тоннаға дейін бидай өңдеуге қауқарлы. Түркістан облысының әкімі Дархан Сатыбалды Түлкібас ауданына іссапарында зауыт жұмысымен танысты. Сондай-ақ бұл аумақта ұн комбинаты, 2 консерві зауыты, әк зауыты жұмыс істеп тұр. Өз өнімдерін таныстырған кәсіпкерлер жеңілдетілген несие алып, бизнестерін кеңейте бастаған. Жергілікті кәсіпкер 7 гектардан жиналған патиссон (табақша тәрізді асқабақ) жемісіне деген сұраныстың жоғары екенін жеткізді. Таулы аймақта ғана өсетін дәруменге бай өсімдік Түлкібас ауданында өсіріле бастаған.

Түлкібас ауданында 32 кәсіпорын жұмыс істеп тұр. Биыл ауданда шағын орта бизнес саласындағы кәсіпорындар саны 10 мыңға жетіп, жаңадан 12 720 жұмыс орны ашылды. Түлкібас ауданында бірнеше көпқабатты тұрғын үй салынып жатыр. Ауданға іссапармен барған Түркістан облысының әкімі Дархан Сатыбалды Нұршуақ мөлтек ауданындағы әлеуметтік тұрғын үйлердің құрылысын бақылады. Бұл жерде 2 қабатты, 20 пәтерлік 2 тұрғын үйдің құрылысы ағымдағы жылдың мамыр айында бастау алған. Нысандар осы жылдың қыркүйек айында толық аяқталып, үй кезегінде тұрған азаматтарға берілмек. Сондай-ақ жаңа шағынауданда 56 пәтерлі үш тұрғын үй салынып жатыр. Аталған баспаналарды банк арқылы қолжетімді бағамен ұсыну бағыттары қарастырылуда. Айта кетейік, бүгінде Түлкібас ауданында 3100 азамат үй кезегінде тұр. Облыс әкімі жауаптыларға ауданды дамыту жұмыстарын жалғастыру, құрылыс сапасын қадағалау, кәсіпкерлікті дамыту, өндіріс орындарын ашу жөнінде нақты тапсырмалар берді.
Өңір басшысы сондай-ақ жұмысын жандандырған жергілікті кәсіпкермен кездесті. «Стас и К» өндірістік кооперативі 2004 жылдан бері газ және су тасымалдауға арналған полиэтилен құбырларларын өндірумен айналысады. Кооператив басшысы жұмысын кеңейтіп, заманауи құрал жабдықтармен жаңа жүйені іске қосқан. Бүгінгі таңда өндіріс ошағында 40 адам тұрақты жұмыспен қамтылып отыр. Түлкібас ауданына келген өңір басшысы билік пен халық бірлесе жұмыс атқарса ғана аймақ дамитынын айтты. Өндіріс орнын ашу, инвестиция тарту, ауылдарды абаттандыру, тазалық жағдайын жақсарту мәселесі маңызды екенін жеткізді. Атқарылған жұмыстарды баяндай келе, Дархан Сатыбалды ауданның мүмкіндігі жоғары, онымен қоса өндіріс пен туризмді дамытуға қолайлы екенін тілге тиек етті.
Жиында аудан әкімі Нұржан Ізтілеуовтың есебі тыңдалды. Әкімнің айтуына сүйенсек, ауданның 5 айда атқарылған жұмыстары өткен жылмен салыстырғанда 107,8% өскен. Айта кетейік, ағымдағы жылы ауданның өнеркәсіп өнімінің көлемі артып, жұмыстар артығымен атқарылған.
Кездесу барысында есептен бөлек халықтың сұрақтары мен өтініштеріне кезек берілді. Тұрғындар тарапынан ауыз су, жер сияқты мәселелер қозғалды.  Сонымен қоса әкім «Таза Қазақстан» акциясында айта кетті. «Өкінішке қарай, әзірге бюджеттік мекеме қызметкерлері ғана белсенді атсалысуда. Күл-қоқысты көрген бала оны қалыпты жағдай деп қабылдауы мүмкін. Сондықтан қоршаған ортаны таза ұстап, тұтас ел болып үлгі көрсетуіміз керек»-, деген Дархан Сатыбалды аудан тұрғындарын еліміздің барлық өңірінде басталған акцияға белсене қатысуға шақырды. Айта кетейік, кездесу соңында қариялар бата беріп, әкімге алғыстарын білдірді. Тұрғындардың сөзіне сүйенсек, облыс әкіміне айтылған өтініштер өз шешімін тауып, ауданда жұмыстар қарқынды жүріп жатыр деседі. Жиында Дархан Сатыбалды инвестиция тарту, өндіріс орындарын ашу бағытындағы жұмыстарды күшейтуді тапсырды.