ӘКІМ ХАЛЫҚПЕН КЕЗДЕСТІ

Ауданның жүз пайызы газбен қамтылып, асфальт жолдар төселген. Иә, дұрыс есітіп тұрсыз. Сауран ауданы тұрғындары жеті ай бұрын әкім болып сайланған Мақсат Таңғатаровқа дән риза. Мемлекет басшысы «Барлық деңгейдегі әкімдер жыл бойы халықпен кездесулер өткізсін. Олардың барысында халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін»,- деп тапсырма берген болатын. Осыған орай, ағымдағы жылдың 1-ші жарты жылдығында Сауранның әкімі аудан тұрғындарымен кездесу өткізіп, атқарылған жұмыстар жайлы баяндады. Кездесу алдымен Шаға ауылдық округінде бастау алды. Мақсат Таңғатаров 5 ай ішінде атқарған және де алдағы уақытта атқарылатын жұмыстар жайын айтты. Әкімнің айтуына сүйенсек, 2023 жылы ауданның жалпы өңірлік өнімі 120,4 млрд теңгені құраған болса, биыл 132,4 млрд теңгеге жеткізу жоспарланған.
Сонымен қатар кездесуге Шаға ауылдық округінің әкімі де қатысып, ағымдағы жылдың бес айында атқарған жұмыстарының есебі тыңдалды.
Кездесу барысында ауыл тұрғындары Молда Мұса мектебіне күрделі жұмыс жүргізу, шаруаларға жанар-жағар май мәселесі, электр жарығының әлсіздігі тағы да басқа мәселелерді көтерді. Айта кетейік, ауыл тұрғындары аудан әкімінің жарты жылдықта атқарған жұмыстарына ризамыз деді.
Осы күні Мақсат Таңғатаров Ескі Иқан ауылдық округі тұрғындарымен де кездесу өткізді. Бес айда атқарған жұмыстарын баяндай келе, әр салаға жеке тоқталып, барлық жұмыстарда өсім бар екенін атап өтті. Соның ішінде құрылыс және коммуналдық салалар бойынша атқарылып жатқан жұмыстарға кеңінен тоқталды.
Жиында Ескі Иқан ауылдық округінің әкімі 2024 жылдың 5 айында атқарған жұмыстарын баяндады.
Кездесу барысында ауыл тұрғындары жер мәселесі, көшелерді жарықтандыру сынды сұрақтарды қозғады. Дегенмен айта кетейік, Мақсат Таңғатаров келгелі ауылымызда жандану байқалады деген тұрғындар, толықтай газбен қамтылып, жолдарымыз жөнделді деп қуаныштарын жеткізді.