Болашағынан зор үміт күттіретін еліміздің боксшылары алыс-жақын шет елден келген тәжірибелі қарсыластарымен қолғап түйістірді. «IRFIN PROMOTIONS» промоутерлік компаниясы мегаполисте алғаш рет кәсіби бокс кешін ұйымдастырды. Шаршы алаңда 8 қазақстандық былғары қолғап шебері бақ сынады. Олардың арасында дебюттық кездесу өткізген жас спортшыларымыз да бар.
Қала әкімдігінің қолдауымен «Көрме» орталығында тарихи турнир өтті. «IRFIN PROMOTIONS» промоутерлік компаниясы ұйымдастырған іс-шара барысында Қазақстан, Өзбекстан, Ресей, Филиппин, Тайланд, Моңғолия және Қытайдан келген мықты боксшылар бақ сынады. Бұл бокс кеші құрылғанына 3 ай ғана толған компанияның ұйымдастырып отырған алғашқы кәсіби бокс кеші. Бағдәулет Төрехановтың айтуынша компанияның басты мақсаты талантты боксшылармен жұмыс жүргізу арқылы оларды әлемдік деңгейге шығару.
Тарихи іс-шараның арнайы қонағы атақты боксшы Константин Цзю болды. Сондай-ақ, турнирге шаһар басшысы Ғабит Сыздықбеков, аты аңызға айналған боксшы Серік Қонақбаев және басқа да танымал отандық және шетелдік боксшылар келді. Турнирде алғашқылардың бірі болып қазақстандық былғары қолғап шебері Бауыржан Бекмұрзаев өзбекстандық Дильмуроджон Тошхуджаевпен жұдырықтасты. Бауыржанның жекпе-жегі ұзаққа созылмады. Қазақстандық боксшы қарсыласын алғашқы раундта техникалық нокаутқа түсіріп, кездесуді мерзімінен бұрын аяқтады.
Бұдан бөлек жекпе-жек аясында Елшат Нығметолла, Әлішер Абдуалим, Жолдас Жеңісов, Нұрдос Төлебай қарсыласын қапы қалдырып жеңіске жетсе, Қалдыбек Қалдан, Самат Жетібаев, Армат Арманұлы шаршы алаңда айласын асыра алмады. Олар төрешілер шешімімен қарсыласына есе жіберді.
Айта кетейік, «IRFIN PROMOTIONS» компаниясы бас директорының айтуынша жылдың соңына дейін тағы кәсіби бокс кешін ұйымдастыру жоспарда бар.
