Төрт жылдықтың басты додасы – Париж Олимпиадасының басталуына санаулы айлар қалды. Қазіргі таңда ұлттық құрама спортшылары Олимпиадаға жолдама беретін лицензиялық турнирлер мен рейтингтік додаларға қатысып, ұлттық құрама қоржынын мейлінше көп жолдамамен толықтыруға бар күш-жігерін салып жатыр. Ал Париждегі осы жылдың басты бәсекесіне лицензия алып қойған отандастарымыз жеке бағдарлама бойынша шеберліктерін шыңдап, маңызды жарысқа тыңғылықты дайындалуда, деп хабарлайды ҚР Туризм және спорт министрлігінің баспасөз қызметі.
Ұлттық құрама сапынан Париж Олимпиадасына лицензия жеңіп алған спортшының бірі – боксшы Айбек Оралбай. 92 кг салмақ дәрежесінде жұдырықтасатын отандасымыз Париж Олимпиадасының жолдамасын биыл Италияның Бусто-Арсицио қаласында өткен әлемдік іріктеу кезеңінде жеңіп алды.
Бокстан Париж Олимпиадасының жолдама иегері, 2018 жылы Аргентинаның Буэнос-Айрес қаласында өткен жасөспірімдер арасындағы жазғы Олимпиада чемпионы Айбек Оралбай боксқа күрес үйірмесін іздеп жүріп кездейсоқ келіп қалғанын айтады.
«Әкем күреспен шұғылданған соң, біздің де балуан болғанымызды қатты қалаған болуы керек. Сыңарым Нұрбек екеумізді Астанадағы «Алатау» спорт кешеніне ертіп апарды. Күрес үйірмесін іздеп жүргенде кездейсоқ бокс жаттықтырушысы Асқар Еркебаевқа жолығып қалды. Ол кісі егіз баланы тәрбиелеп, чемпион етіп шығаруды армандап жүргенін айтып, бізді әкемнен сұрап алды. Осылайша, күрес үйірмесін іздеп жүріп боксқа кездейсоқ келіп қалдық», — дейді Айбек Оралбай.
«Қазақстан ұлттық құрамасының 92 кг салмақтағы боксшысы Айбек Оралбай жастар арасындағы бәсекеде де, ерексектер додасында да талай жетістікке жеткен. Ал оның ендігі басты мақсаты – Олимпиаданың алтынын алу. Сол мақсатына жету үшін Айбек ерінбей еңбек етіп жатыр», — деп пікір білдірді ұлттық құраманың бас бапкері Мырзағали Айтжанов.
Қазіргі таңда Айбек Оралбай ұлттық құрама боксшыларымен бірге Париж Олимпиадасына дайындалып жатыр. Кейіпкеріміз Олимпиадада кімнің бағы жанады, сол боксшы чемпион атанады деп есептейді.
«Олимпиададағы қарсыластарыма дайындықты қазірден бастап кеттік. Бірақ техникалық, тактикалық дайындыққа жекпе-жекке бір күн қалғанда кірісеміз. Ауыр салмақ болған соң, біздің салмақта кіл мықты боксшылар жиналған. Халықаралық турнирдің чемпиондарынан бастап, әлем, Азия чемпионатының жеңімпазы мен жүлдегерлеріне дейін бар. Олардың бәрімен шаршы алаңда кездескенмін, көбімен спарринг жасағанбыз. Атап айтқанда, екі дүркін Олимпиада чемпионы, бес дүркін әлем біріншілігінің жеңімпазы кубалық Хулио Сесар ла Круспен, өзбекстандық, италиялық, испаниялық боксшылармен ринг ішнде де, сыртында да кездескенбіз. Былайша айтқанда, қарым-қабілетімен, әлеуетімен таныспын. Олардың бізден асып бара жатқан ештеңесі жоқ. Бәріміз бір деңгейдегі боксшылармыз деп айта аламын. Құдай бұйыртса, Парижде барымды саламын. Бұл жерде көп нәрсе бабыңмен қатар, бағыңа да байланысты екенін ұмытпаған абзал. Кімнің бағы жанады, сол Олимпиада чемпионы болады деп ойлаймын», — дейді ел чемпионы.
2022 жылы шаңырақ көтерген Айбек Оралбай қазіргі таңда бір баланың әкесі. Париждегі Олимпия ойындарына үлкен жауапкершілікпен баратынын, тек өзі үшін емес, отбасы үшін, отаны үшін Франция төрінде әнұранды шырқатқысы келетінін айтады.
